Emma Stone u shfaq më e shkëlqyer se kurrë në një festë pas premierës së filmit të saj të ri, “Bugonia”, në Hollywood.
Aktorja fituese e “Oscar”-it, 35 vjeçe, u fotografua me një pamje të thjeshtë, por plot stil, ndërsa la pas vetes premierën e shumëpërfolur të filmit që trajton teoritë e konspiracionit.
E veshur me një set sportiv të zi, me bluzë me kapuç dhe pantallona të njëjta, Stone tërhoqi vëmendjen me lëkurën e saj të tendosur dhe shkëlqimin natyral, duke dëshmuar se nuk i duhet glamuri për të rrezatuar elegancë, shkruan DailyMail.
Dalja e saj vjen në një moment kur fansat po flasin për ndryshimet në pamjen e saj, pas një fotografie me Lisa Manobal të Blackpink gjatë Javës së Modës në Paris, që ndezi debate për ndërhyrje estetike të mundshme.
Premiera e “Bugonia” ka ndezur gjithashtu diskutime të shumta për shkak të temës së saj. Filmi, nën regjinë e Yorgos Lanthimos, është një komedi e errët dhe satirike ku Stone luan rolin e një CEO-je që rrëmbehet nga dy burra të bindur se ajo është një aliene që synon të shkatërrojë Tokën.
Aktorja ndan ekranin me Jesse Plemons dhe Alicia Silverstone në këtë ribërje të filmit korean “Save the Green Planet!”.
Gjatë një sesioni pyetje-përgjigje në Festivalin e Filmit Telluride, Stone shkaktoi reagime kur e krahasoi subjektin e filmit me rastin real të Luigi Mangione, i akuzuar për vrasjen e një drejtori ekzekutiv në New York.
“Çfarë është e çmendur është se e xhiruam filmin, dhe pak më vonë ndodhi një ngjarje e ngjashme. Ishte e frikshme”, tha ajo.
“Bugonia” do të shfaqet në kinematë botërore më 31 tetor, në prag të Halloween-it, dhe pritet të jetë një nga projektet më intriguese të Lanthimos dhe Stone pas suksesit të “Poor Things”.
