Ngrohja globale po vret një person çdo minutë në të gjithë botën, dhe që nga vitet 1990, shkalla e vdekjeve të lidhura me nxehtësinë dhe valët e nxehtësisë është rritur me 23 për qind, edhe pasi të merret parasysh rritja e popullsisë.
Kjo u botua në analizën më gjithëpërfshirëse të këtij lloji për të studiuar ndikimin e krizës klimatike në shëndetin e njeriut.
Raporti pohon se varësia globale nga lëndët djegëse fosile po shkakton ndotje toksike të ajrit, zjarre të mëdha në pyje dhe përhapjen e sëmundjeve të tilla si ethet e dengut, ndërsa përpjekjet e dështuara për të trajtuar ngrohjen globale po vrasin miliona njerëz çdo vit.
Hulumtimi u krye nga Universiteti i Sidneit dhe Kolegji Universitar i Londrës, raporton Guardian, përcjell KosovaPress.
“Ky raport paraqet një pamje të zymtë dhe të pamohueshme të dëmit shkatërrues shëndetësor që arrin në çdo cep të botës. Shkatërrimi i jetëve dhe i mjeteve të jetesës do të vazhdojë të përshkallëzohet derisa të japim fund varësisë sonë nga karburantet fosile”, tha Marina Romanello nga Kolegji Universitar i Londrës, e cila udhëhoqi hulumtimin.
Raporti zbuloi gjithashtu se shkalla e vdekjeve të lidhura me nxehtësinë dhe ndryshimet klimatike është rritur me 23 për qind që nga vitet 1990, edhe pasi të merret parasysh rritja e popullsisë – në një mesatare prej 546 mijë në vit midis viteve 2012 dhe 2021.
“Kjo është rreth një vdekje e lidhur me nxehtësinë çdo minutë çdo vit. Është një numër vërtet i tmerrshëm dhe është ende në rritje. Ne vazhdojmë t’u themi njerëzve se stresi nga nxehtësia mund të ndikojë në të gjitha aspektet e jetës dhe mund të çojë në vdekje, por nuk mendoj se shumë njerëz e kuptojnë këtë, dhe jam i bindur se çdo vdekje e lidhur me nxehtësinë është e parandalueshme”, tha profesori Ollie Jay pranë Universitetit të Sidneit në Australi.
Gjatë katër vjetëve të fundit, një person mesatar është ekspozuar ndaj 19 ditëve të nxehtësisë kërcënuese për jetën çdo vit, 16 prej të cilave nuk do të kishin ndodhur pa ngrohjen globale të shkaktuar nga njeriu, thuhet në raport.
Në përgjithësi, ekspozimi ndaj temperaturave të larta ka rezultuar në një rekord prej 639 miliardë orësh pune të humbura në vitin 2024, duke kushtuar 6 për qind të Prodhimit Bruto të Brendshëm në vendet më pak të zhvilluara.
