Në sondazhin ‘Zëri i Shqiptarëve’, u bëra këtë pyetje 1140 banorëve të rritur krejt të rastësishëm në gjithë territorin e vendit: “Për cilin nga këta 6 drejtues të shtetit shqiptar të 100 vjetëve të fundit keni vlerësimin MË pozitiv?” Gjithashtu i pyeta edhe sesi kishin votuar në zgjedhjet parlamentare të 11 majit.
Nga sondazhi rezultoi se vetëm 40.2% e të anketuarve vlerësojnë më shumë Ahmet Zogun (16.1%) ose Sali Berishën (24.1%) – që ndodhen në krahun e djathtë të grafikut të mëposhtëm. Nga ana tjetër, pothuaj 60% vlerësojnë më shumë ose Enver Hoxhën (7%), ose Ramiz Alinë (1.3%), ose Fatos Nanon (17.9%), ose Edi Ramën (33.6%) – që ndodhen në krahun e majtë të grafikut të mëposhtëm.
Nga sondazhi rezultoi se vetëm 77% e të anketuarve kishin marrë pjesë në zgjedhjet e 11 majit, kurse plot 23% nuk kishin votuar fare. Po cilët udhëheqës të 100 viteve të fundit simpatizojnë pjesëmarrësit dhe mospjesëmarrësit e këtushëm të 11 majit?
Pjesëmarrësit e zgjedhjeve të 11 majit brenda vendit
Ndër pjesëmarrësit brenda vendit, vetëm 38.2% simpatizojnë Sali Berishën (30.8%) ose Ahmet Zogun (7.4%) – shihni grafikun e mëposhtëm. Dhe shumica e këtyre simpatizantëve e dhanë votën për PD-ASHM, e pjesërisht për Partinë Mundësia të Shehajt, Koalicionin Euroatlantik të Bashës, Koalicionin Djathtas për Zhvillim të Shehit, etj.
Nga ana tjetër, plot 61.8% e pjesëmarrësve brenda vendit simpatizojnë ose Edi Ramën (42.8%), ose Fatos Nanon (13.1%), ose Enver Hoxhën (5%), ose Ramiz Alinë (0.8%). Dhe shumica e këtyre simpatizantëve e dhanë votën për PS-në, e pjesërisht për PSD-në, Koalicionin Nisma Shqipëria Bëhet të Lapaj-Shabanit, Lëvizjen Bashkë të Qorit, etj.
Mospjesëmarrësit e zgjedhjeve të 11 majit brenda vendit
Ndër mospjesëmarrësit e këtushëm, më pak se gjysma (46.9%) janë simpatizantë të Ahmet Zogut (45.3%) ose të Sali Berishës (1.6%). Nga ana tjetër, më shumë se gjysma e mospjesëmarrësve të këtushëm (53.1%) janë simpatizantë ose të Fatos Nanos (33.9%), ose të Enver Hoxhës (13.4%), ose të Ramiz Alisë (3.1%), ose të Edi Ramës (2.7%) – shihni grafikun e mëposhtëm.
Përmbledhje: Problemi elektoral i opozitës
Duke përmbledhur, opozita ka një deficit gjigant politik ndër votuesit e këtushëm, ndërkohë që deficit ka edhe ndër mosvotouesit e këtushëm. Për më tepër, te këta të fundit dominon fort simpatia për një lider të djathtë të shekullit të shkuar, e jo për liderin aktual të opozitës. Dhe ç’është më dëshpëruesja për opozitën, simpatizantët e Zogut, krahasuar me ata të Breishës, janë në përgjithësi më të rinj në moshë, më të arsimuar, dhe më urbanë…
