Pavarësisht pasigurive në industri, 2025 u konfirmua si një vit i mirë për kinemanë, me filma të guximshëm, personalë dhe imagjinativë që gjetën audiencë. Nga suksesi i papritur i “Sinners” te rikthimi i dëshirës për përvojën në sallat e kinemasë, publiku tregoi se ende e do filmin.
Viti 2025 rezultoi ndryshe nga parashikimet pesimiste për industrinë e filmit, duke sjellë një valë veprash të guximshme, personale dhe artistikisht të veçanta.
Sipas përzgjedhjes së kritikëve të Associated Press, dhjetë filma u veçuan si më përfaqësuesit e vitit, duke dëshmuar se kinemaja vazhdon të evoluojë edhe në kohë pasigurie.
Në krye të listës qëndron “One Battle After Another”, një udhëtim energjik dhe emocional i Paul Thomas Anderson, i ndjekur nga “If I Had Legs I’d Kick You”, një portret i ashpër dhe surreal i lodhjes dhe ankthit prindëror.
“Marty Supreme” solli një histori intensive ambicieje dhe egoje, ndërsa “Sentimental Value” u ndal te familja, humbja dhe dashuria e pathënë. Surprizë e studios u konsiderua “The Naked Gun”, një komedi që riktheu humorin absurd në kinema.
Ndërkohë, “Sinners” u shndërrua në fenomen kulturor, duke kombinuar horrorin, muzikën blues dhe historinë afro-amerikane.
Atmosferë poetike dhe misterioze solli “Sound of Falling”, ndërsa “It Was Just an Accident” ngriti pyetje të forta morale mbi drejtësinë dhe hakmarrjen.
Dokumentari tronditës “The Voice of Hind Rajab” i dha zë tragjedisë njerëzore të luftës, ndërsa lista u plotësua nga tre debutime të rëndësishme artistike: “Urchin”, “The Chronology of Water” dhe “Don’t Let’s Go to the Dogs Tonight”, filma që trajtojnë plagë sociale, trauma personale dhe histori të vështira me ndjeshmëri dhe guxim.
Këta dhjetë filma e bënë 2025-n një vit për t’u mbajtur mend, duke provuar se përtej shifrave të arkëtimeve dhe çmimeve, janë historitë dhe vizioni artistik ato që e mbajnë gjallë kinemanë.
