Fernando Martin, trajner i Valencia CF Femenino B, ka ndërruar jetë tragjikisht në Indonezi së bashku me tre anëtarë të familjes së tij, pasi varka me të cilën po udhëtonin u përmbys në kushte të vështira moti. Klubi i Valencias ka reaguar duke shprehur dhimbje të thellë për humbjen, duke theksuar se është “thellësisht i trishtuar nga vdekja e Fernando Martin dhe tre fëmijëve të tij, në aksidentin tragjik me varkë në Indonezi”, sipas konfirmimit nga autoritetet lokale.
Autoritetet indoneziane dhe spanjolle kanë bërë të ditur se varka, e cila transportonte 11 persona, u mbyt të premten në ngushticën pranë ishullit Padar, afër Labuan Bajo, një zonë e njohur turistike.
Kërkimet për të zhdukurit kanë vazhduar edhe të dielën, ndërsa sipas agjencisë indoneziane të kërkim-shpëtimit, gruaja dhe një vajzë e Martinit, si dhe anëtarë të tjerë të ekuipazhit, janë shpëtuar dhe ndodhen në gjendje të mirë shëndetësore.
Ngushëllime ka dërguar edhe Real Madrid CF për Martinin, 44 vjeç, ish-lojtar i futbollit spanjoll të nivelit të dytë, i cili këtë vit ishte emëruar trajner i ekipit B të femrave të Valencias. Vdekja e tij ka prekur thellë komunitetin e futbollit në Spanjë.
