Glauk Olldashi, djali i ish-deputetit të ndjerë Sokol Olldashi, ka artikuluar një kritikë të drejtpërdrejtë ndaj kryetarit të Partisë Demokratike, Sali Berisha, gjatë një takimi të zhvilluar me Forumin Rinor të PD-së.
Në një ndërhyrje që bie ndesh me retorikën e zakonshme të strukturave partiake, Olldashi ka pranuar hapur se Partia Demokratike po vuan nga probleme serioze të brendshme, të cilat sipas tij duhet të diskutohen fillimisht brenda partisë.
“PD ka shumë probleme sot. Do të ishte mirë të bënim një takim pa kamera dhe media, sepse jam me parimin që problemet e shtëpisë fliten brenda saj dhe jo në sytë e botës,” u shpreh ai.
Por kritika më e fortë e tij lidhet me organizimin e Foltoreve të përjavshme përpara Kryeministrisë, të cilat sipas Olldashit kanë pjesëmarrje të ulët dhe po dëmtojnë imazhin e partisë.
“Çdo të hënë bëjmë Foltore para Kryeministrisë dhe pjesëmarrja nuk është shumë e lartë. Njerëzit nuk duan të vijnë të hënave, problemi qëndron te Foltorja,” tha ai, duke vënë në shënjestër cilësinë e folësve.
Sipas Glauk Olldashit, një pjesë e personave që marrin fjalën në Foltore nuk janë të denjë për të përfaqësuar Partinë Demokratike dhe po e dëmtojnë seriozisht perceptimin publik.
“Mendimi im është që shumë nga folësit aty nuk janë të denjë të na përfaqësojnë. Nuk di kush i zgjedh, por folësit që dalin aty po bëjnë faj ndaj nesh, flasin kuturu, disa edhe tapë. Na dëmton të gjithëve, sidomos ne të rinjve. Dëmtimi i imazhit të PD na dëmton më shumë ne se ju, doktor,” u shpreh ai.
Në vend të formatit aktual, Olldashi sugjeroi një qasje më tematike dhe profesionale për Foltoret, me fokus në çështje konkrete dhe me pjesëmarrjen e ekspertëve.
“Çdo të hënë të bëjmë një Foltore specifike: një për arsimin, një për mjekësinë, bujqësinë, naftëtarët. Problemet në Shqipëri janë pa fund. Na duhen ekspertë që kur njerëzit të na ndjekin, të na dëgjojnë me vëmendje e të mos shohin fytyra që na bëjnë të qeshim,” tha ai.
Ndërhyrja e tij shënon një nga kritikat më të hapura nga brezi i ri brenda PD-së ndaj lidershipit aktual, duke nxjerrë në pah tensionin mes diskursit tradicional të partisë dhe kërkesës për reformim të imazhit dhe përmbajtjes.
