Ish-presidenti i Shteteve të Bashkuara, Joe Biden, ka reaguar me shqetësim të thellë ndaj ngjarjeve tronditëse që kanë ndodhur gjatë javëve të fundit në Minneapolis, ku tensionet u rritën ndjeshëm për shkak të pranisë së autoriteteve federale të zbatimit të ligjit për emigracionin.
Ai ka dënuar me forcë dhunën dhe ka shprehur pikëllimin e tij për humbjen e jetëve të dy qytetarëve amerikanë, të cilët u vranë gjatë përplasjeve me agjentët federalë, teksa qytetarët protestonin për të kundërshtuar metodat dhe praninë e autoriteteve në komunitetet e tyre.
“Dhuna dhe terrori nuk kanë vend në Shtetet e Bashkuara të Amerikës, veçanërisht kur vetë qeveria jonë shënjestron qytetarë amerikanë,” deklaroi demokrati, paraardhësi i Donald Trumpit, duke shtuar se këto ngjarje “shkelin vlerat më themelore mbi të cilat janë ndërtuar Shtetet e Bashkuara”.
Ish-presidenti gjithashtu u bëri thirrje autoriteteve federale dhe lokale që të veprojnë me maturi dhe transparencë, duke shmangur përdorimin e dhunës ndaj komuniteteve, dhe të përqendrohen në dialog dhe masa ligjore që respektojnë jetën dhe dinjitetin e çdo qytetari.
