Qershori pritet të jetë momenti kyç për Sergio Ramosin dhe planet e tij për të blerë Sevilla-n. Ish-kapiteni i Real Madridit, së bashku me fondin Five Eleven Capital, po ndjekin një plan të qartë, por askush nuk pret që marrëveshja të mbyllet para fillimit të verës.
Ramos dhe partnerët e tij kanë gjetur tashmë një grup investitorësh për shumën e madhe prej rreth 450 milionë eurosh, që nevojitet për operacionin.
Kjo shifër përfshin blerjen e rreth 65% të aksioneve të klubit, si dhe fondet për një rritje të domosdoshme të kapitalit. Një pjesë e kësaj rritjeje, rreth 80 milionë euro, mund të mbulohet nga investitorë të tjerë.
Edhe pse është bërë një analizë paraprake e financave të klubit, do të kryhet një “due diligence” e re për të pasur një panoramë të plotë. Sevilla mbart një borxh të konsiderueshëm dhe jo shumë të qartë, ndaj çdo detaj duhet verifikuar me kujdes.
Një faktor vendimtar mbetet situata sportive. Skuadra e drejtuar nga Matías Almeyda po lufton për mbijetesë dhe rreziku i rënies në Segunda División është real. Nëse ndodh një skenar i tillë, vlera e klubit do të binte ndjeshëm.
Prandaj, gjithçka pritet të qartësohet pas përfundimit të LaLiga-s, në fund të majit, kur edhe e ardhmja e Sevillës do të marrë formë përfundimtare.
