Juventusi ka miratuar një rritje kapitali deri në 250 milionë euro, me synimin për të përmirësuar financat e klubit dhe për të investuar në përforcimin e skuadrës.
Sipas planit të drejtuesve, rreth 100 milionë euro pritet të vihen në dispozicion për investime të reja, ku prioritet do të ketë ekipi i parë.
Sipas Football Italia, duke iu referuar Gazzetta dello Sport, 99.9 për qind e aksionarëve votuan pro autorizimit të bordit për të nisur procesin, gjatë mbledhjes së zhvilluar të martën në stadiumin Allianz.
Rritja e kapitalit synon të forcojë gjendjen financiare të klubit, të rrisë konkurrueshmërinë sportive dhe të mundësojë investime në asete strategjike, përfshirë stadiumin dhe zhvillimin e markës së Juventusit.
Klubi vjen nga një sezon financiar i vështirë. Për sezonin 2025/26, Juventusi raportoi humbje prej 66 milionë eurosh, kundrejt 58.1 milionë eurove në sezonin paraardhës. Një nga faktorët që ndikoi në përkeqësimin e bilancit ishte moskualifikimi në Ligën e Kampionëve.
Aksionari kryesor, Exor, që zotëron 65.4 për qind të aksioneve, ka marrë përsipër të mbulojë pjesën që i takon në rritjen e kapitalit, si dhe çdo shumë që mund të mos mbulohet nga aksionarët e tjerë. Kompania ka paguar tashmë 60 milionë euro si paradhënie.
Sipas planit financiar, rreth 45 deri në 50 për qind e shumës do të përdoret për të përforcuar bilancin e klubit gjatë këtij sezoni dhe atij të ardhshëm. Pjesa tjetër, rreth 100 milionë euro, do të shërbejë për investime, me përparësi për skuadrën e parë.
Drejtuesit e Juventusit kanë sinjalizuar se do të jenë aktivë në përgatitjet për merkaton e janarit. Megjithatë, sipas raportimit, lëvizjet në tregun e transferimeve do të duhet të marrin parasysh edhe kufizimet që burojnë nga marrëveshja me UEFA-n për çështjet financiare.
Kjo do të thotë se, pavarësisht kapitalit të ri, klubi duhet të ruajë kujdes në shpenzime dhe të planifikojë me kujdes afrimet e mundshme.
Lajmi për investimet vjen pas fitores 2-0 ndaj Napolit, rezultat që i dha tri pikë të rëndësishme skuadrës së Luciano Spallettit.
Me këtë rritje kapitali, Juventusi synon të krijojë bazat për një periudhë më të qëndrueshme financiarisht dhe më konkurruese në aspektin sportiv. Merkaton e janarit drejtuesit mund ta shfrytëzojnë si hapin e parë për të përforcuar ekipin.
