Ka përfunduar marshi “Drejtësi, jo politikë” me të cilin është kërkuar drejtësi për ish-krerët e UÇK-së që po gjykohen në Hagë.
Në marshin e mbajtur në sheshin “Skënderbeu” në Prishtinë kanë marrë pjesë mijëra qytetarë nga të gjitha trevat shqiptare.
Përveç qytetarëve të shumtë nga vendi, rajoni dhe më gjerë, në këtë marsh mori pjesë edhe presidentja e Kosovës, Vjosa Osmani e cila ishte krah djalit të ish-presidentit, Hashim Thaçi, Endritit.
E ndonëse në paraburgim katërshja e Ushtrisë Çlirimtare të Kosovës e ndoqi këtë marsh në mbështetje të tyre, marsh ky i cili sot pushtoi sheshet e kryeqytetit të Kosovë.
Me pankartat në duar “Liria ka Emër”, “Historia nuk mund të rishkruhet”, “Liri në emër të popullit” shqiptarët kërkuan drejtësi për ish-udhëheqësit e Ushtrisë Çlirimtare të Kosovës.
Themeluesi i platformës “Liria ka Emër”, Ismajl Tasholli tha se pavarësisht proceseve gjyqësore, lufta e UÇK-së ishte çlirimtare dhe nuk mund të relativizohet.
