Një tentativë për sulm seksual ndodhi në Romë, në parkun Villa Borghese, një nga vendet më të famshme në kryeqytetin italian.
Incidenti ndodhi në një rrugë kryesore që kalon nëpër park. Sipas informacionit të raportuar nga faqja e internetit romatoday.it, një studente britanike 21-vjeçare, e cila ndodhet në Itali për studime, iu afrua një burrë i panjohur. Autori e shtyu atë pas një shkurreje dhe u përpoq t’i griste rrobat.
Gruaja e re filloi të bërtiste për ndihmë dhe burri iku me vrap, duke u zhdukur para se të mbërrinin autoritetet.
Sipas të njëjtave informacione, një shofer taksie që po kalonte ndaloi për ta ndihmuar, ndërsa karabinierët nxituan në vendngjarje dhe nisën një hetim për tentativë dhune seksuale.
21-vjeçarja u dërgua në një spital të madh universitar në Romë, ku u aktivizua “protokolli rozë” i posaçëm për viktimat e abuzimit seksual. Rrobat që ajo mbante veshur u konfiskuan për analiza laboratorike.
Autoritetet italiane kanë mbledhur pamje nga kamerat e sigurisë në zonë dhe po vazhdojnë hetimet e tyre për të gjetur dhe identifikuar autorin e krimit.
