Me 16 gusht të vitit 1977, Elvis Presley u gjet pa ndjenja në dyshemenë e banjës së shtëpisë së tij Graceland, në moshën 42-vjeçare. Zyrtarisht, vdekja iu atribuua aritmisë kardiake. Megjithatë, me kalimin e viteve, ajo është lidhur me përdorim afatgjatë të ilaçeve me recetë dhe me probleme serioze shëndetësore, përfshirë kapsllëkut të rëndë dhe sëmundjessë zemrës, mushkërive dhe mëlçisë, disa prej të cilave mund të kenë qenë gjenetike.
Ditët e fundit
Pas koncertit të tij të fundit në Indianapolis më 26 qershor 1977, Presley qëndroi në Graceland duke pushuar. Ai kaloi kohë me vajzën e tij 9-vjeçare, Lisa Marie Presley, dhe të fejuarën, Ginger Alden. Po përgatitej për një turne që do të niste më 17 gusht. Edhe pse shumë e këshilluan ta anulonte, ai refuzoi, duke thënë se të tjerët vareshin prej tij. Ditën e fundit të jetës luajti raketboll, këndoi në piano dhe tha: “Ky do të jetë turneu më i mirë deri tani.”
Rrethanat e vdekjes
Rreth orës 14:30 të 16 gushtit, Alden e gjeti pa ndjenja në banjë. Ngurtësimi i trupit kishte filluar, çka sugjeronte se kishte disa orë që kishte ndërruar jetë. U dërgua me urgjencë në spital, ku u shpall i vdekur një orë më vonë. Mjeku ligjor i qarkut e regjistroi shkakun si aritmi kardiake, por u theksua se kishte edhe faktorë të tjerë të rëndësishëm shëndetësorë.
Studiues dhe mjekë besojnë se Presley vdiq mes orës 4:00 dhe 9:00 të mëngjesit, ndërsa përpiqej të kryente jashtëqitje. Ai vuante nga një formë e rëndë e megakolonit, zorra e trashë ishte dy herë më e gjerë se normalja dhe e bllokuar rrezikshëm. Sforcimi mund të ketë shkaktuar një reagim trupor (manovra Valsalva), që kompreson enët e mëdha të gjakut dhe mund të nxisë aritmi fatale.
Roli i ilaçeve
Vitet e përdorimit të qetësuesve, amfetaminave dhe narkotikëve përkeqësuan gjendjen e tij shëndetësore. Në një çështje gjyqësore të vitit 1981 kundër mjekut të tij personal, GeorgeNichopoulos, u provua se ai i kishte përshkruar më shumë se 19,000 doza narkotikësh, qetësuesish dhe stimuluesish në 31 muajt para vdekjes. Raporti toksikologjik pas vdekjes tregoi mbi një duzinë substancash, përfshirë morfinë, kodeinë, kualudes, demerol dhe valium. Nichopoulos u shpall i pafajshëm për vepër penale, por më vonë humbi licencën mjekësore.
Në gjysmën e parë të vitit 1977, Presley dha 60 koncerte. Ai përdorte amfetamina për të përballuar shfaqjet dhe qetësues për pagjumësinë, një cikël i ashpër që dëmtoi rëndë trupin e tij. Në skenë shfaqeshin shenja të dështimit kongjestiv të zemrës, si fryrje në bark, duar dhe këmbë. Ai u shtrua disa herë në spital në vitet e fundit për hipertension, artrit, glaukomë dhe probleme me organet, por vazhdoi të performonte për të mbështetur financiarisht shumë njerëz që vareshin prej tij.
Siç është thënë nga studiues të jetës së tij, bujaria dhe dëshira për të vazhduar turnetë ishin njëkohësisht bekim dhe mallkim për të, dhe në fund, trupi i tij nuk e përballoi më.
