Barcelona ka shfrytëzuar në maksimum hapin fals të Real Madrid, duke marrë një fitore bindëse 4-1 ndaj Espanyol në derbin katalanas dhe duke u shkëputur në krye të La Liga me nëntë pikë diferencë.
Skuadra e Hansi Flick e nisi ndeshjen me dominim të plotë, duke kontrolluar ritmin dhe zotërimin e topit që në minutat e para. Avantazhi erdhi shpejt, kur Ferran Torres shënoi me kokë pas një goditjeje nga këndi të ekzekutuar saktë nga Lamine Yamal.
Dyshja u kombinua sërish më vonë, me Yamal që dhuroi një asist të shkëlqyer dhe Torres që përfitoi për të shënuar golin e dytë, duke i dhënë Barcelonës qetësi dhe kontroll të plotë të pjesës së parë.
Në pjesën e dytë, Espanyol arriti të rikthehej përkohësisht në lojë me një gol të bukur të Pol Lozano, i cili ngushtoi diferencën dhe i dha moment të shkurtër shprese miqve.
Megjithatë, reagimi i Barcelonës ishte i menjëhershëm. Lamine Yamal riktheu epërsinë e thellë me golin e tretë pas një aksioni të shpejtë dhe të rrjedhshëm, duke vulosur praktikisht fatin e ndeshjes. Në fund, Marcus Rashford kompletoi rezultatin 4-1, duke e mbyllur një mbrëmje të suksesshme për katalanasit.
Me këtë fitore, Barcelona forcon ndjeshëm pozitat në krye të tabelës dhe vazhdon formën e shkëlqyer në kampionat, ndërsa Espanyol mbetet në krizë rezultatesh, pa fitore në javët e fundit të sezonit.
