Këshilli Bashkiak i Tiranës ka miratuar strukturën e re të pagave për vitin 2026 për organikën e Bashkisë së kryqytetit, duke sjellë një rritje të përgjithshme të pagave për funksionarët, nëpunësit civilë dhe punonjësit administrativë.
Në majën e hierarkisë, paga e Kryetarit të Bashkisë është rritur nga 318,750 lekë në 326,719 lekë bruto, ose rreth 2.5%. E njëjta normë rritjeje aplikohet edhe për pozicionet e tjera të nivelit të lartë, si zv.kryetari (nga 270,000 në 276,750 lekë), Sekretari i Përgjithshëm (nga 217,000 në 222,425 lekë) dhe drejtorët e kabinetit apo drejtorët e përgjithshëm (nga 180,000 në 184,500 lekë). Edhe këshilltarët e kryetarit dhe drejtorët e drejtorive në nivelin II kanë një rritje të ngjashme, nga 155,000 në 158,875 lekë, përsëri rreth 2.5%.
Ndërkohë, në nivelet e mesme të administratës, rritja bëhet disi më e theksuar. Përgjegjësit e sektorit në kategorinë III kanë një rritje nga 115,000 në 119,000 lekë bruto, ose rreth 3.5%. Kjo tregon një tendencë për të rritur më shumë pagat në nivelet ku përgjegjësitë operative janë më të drejtpërdrejta.
Rritja më e ndjeshme vihet re tek specialistët, ku diferencimi është edhe më i fortë. Specialistët e nivelit IV-1 rriten nga 90,000 në 95,000 lekë, ose rreth 5.6%. Për nivelin IV-2 paga rritet nga 80,000 në 85,000 lekë, rreth 6.25%, ndërsa për specialistët e nivelit më të ulët IV-3 paga rritet nga 70,000 në 75,000 lekë, ose rreth 7.1%. Pra, sa më i ulët niveli në hierarki, aq më e lartë është përqindja e rritjes.
Ndryshimi më i fortë vërehet tek punonjësit administrativë, ku politika e rritjes është dukshëm më agresive. Sekretaret, magazinierët dhe recepsionistët kalojnë nga 47,000 në 57,000 lekë bruto, një rritje prej rreth 21.3%. Punonjësit e shërbimit rriten nga 46,000 në 56,500 lekë, ose rreth 22.8%. Shoferët përfitojnë një rritje nga 45,000 në 56,000 lekë, rreth 24.4%, ndërsa pastrueset shënojnë rritjen më të lartë, nga 41,000 në 54,000 lekë, ose rreth 31.7%./ekofin.al
