Një situatë e rëndë sigurie po zhvillohet në Kiev, ku autoritetet kanë ndërmarrë një operacion të gjerë pas një incidenti me të shtëna dhe marrje pengjesh në një supermarket.
Sipas informacioneve paraprake, një person i armatosur ka hyrë në një dyqan Walmart, pasi ka hapur fillimisht zjarr në rrugë, dhe më pas ka hyrë brenda duke mbajtur peng persona të shumtë. Dëshmitarë nga vendi i ngjarjes raportojnë për momente paniku, ndërsa askush nuk është lejuar të largohet nga ambientet.
Forca të shumta policie dhe njësi speciale kanë rrethuar zonën, ndërsa operacioni për neutralizimin e autorit vijon. Kryebashkiaku i qytetit, Vitali Klitschko, konfirmoi se agresori mbetet ende brenda supermarketit dhe se nga brenda ndërtesës janë dëgjuar të shtëna armësh.
Bilanci paraprak flet për viktima dhe të plagosur. Sipas autoriteteve, dy persona janë gjetur të pajetë në lagjen Holosiivskyi, ndërsa pesë të plagosur janë transportuar në spitalet e kryeqytetit. Mes tyre ndodhet edhe një fëmijë, i cili është dërguar me urgjencë për trajtim mjekësor, si dhe disa të rritur që po marrin ndihmë në vendngjarje. Një roje sigurie i supermarketit raportohet gjithashtu i plagosur.
Sipas mediave lokale, autori i dyshuar i ka vënë flakën apartamentit të tij përpara se të kryente sulmin, duke ngritur dyshime për një akt të planifikuar.
Ngjarja vjen në një kohë kur autoritetet janë ende në alarm pas një incidenti të ngjashëm në Odessa, ku një person i armatosur hapi zjarr ndaj kalimtarëve, pa shkaktuar viktima.
Operacioni në Kiev vijon, ndërsa autoritetet u bëjnë thirrje qytetarëve të shmangin zonën dhe të ndjekin udhëzimet e sigurisë.
