Studiuesi holandez i shpendëve Leo Schilperoord është cilësuar si “pacienti zero” i dyshuar në shpërthimin vdekjeprurës të hantavirusit në bordin e anijes turistike MV Hondius.
Shpërthimi ka marrë tashmë të paktën tre jetë sipas Organizatës Botërore të Shëndetësisë (OBSH), përfshirë atë të Schilperoord dhe gruas së tij, Miriam Schilperoord.
Ornitologu 70-vjeçar thuhet se hipi në anijen MV Hondius pasi vizitoi Ushuaia-n, Argjentinë, me gruan e tij Miriam, 69 vjeç, gjatë një ekspedite njëmujore për vëzhgimin e zogjve në të gjithë Amerikën e Jugut.
Hetuesit tani besojnë se çifti u infektua me virusin e Andeve pranë një zone deponie të njohur për infektimin me minj para se të hipte në anije.
Çifti holandez dyshohet se thithi këto grimca të variantit të Andeve të afta të përhapen nga njeriu te njeriu. Simptomat filluan disa ditë pasi hipën në anijen MV Hondius. Katër ditë pasi vizituan deponinë, Leo dhe Miriam hipën në anijen MV Hondius në Ushuaia së bashku me më shumë se 100 pasagjerë që ishin gjithashtu shkencëtarë ose vëzhgues zogjsh. Leo thuhet se zhvilloi simptoma, duke përfshirë ethe, diarre, dhimbje koke dhe dhimbje stomaku, deri më 6 prill. Ai vdiq në anije më 11 prill.
Më 24 prill, në një ndalesë të planifikuar në ishullin Atlantik të Santa Helenës, Miriam, së bashku me trupin e Leos, dolën nga anija. Ajo mori një aeroplan për në Johanesburg, Afrikën e Jugut, dhe më pas hipi në një fluturim të KLM që po shkonte për në Holandë. Por ajo nuk arriti kurrë në shtëpi. Ajo u nxor nga ekuipazhi kur ata përcaktuan se ishte shumë e sëmurë për të udhëtuar. Të nesërmen, ajo ndërroi jetë pasi u rrëzua në aeroport.
