Futbolli grek është tronditur nga lajmi i ndarjes nga jeta të ish-futbollistit të njohur Paraskevas Antzas, i cili ka ndërruar jetë në moshën 49-vjeçare, pas një beteje të gjatë dhe të guximshme me sëmundjen e neuroneve motorike.
Ish-qendërmbrojtësi ishte një nga figurat më të dashura të Olympiacos, ku u shndërrua në një lojtar kyç gjatë dy periudhave të suksesshme me klubin nga Pireu. Antzas fitoi shtatë tituj të Superligës greke dhe tre Kupa të Greqisë, ndërsa regjistroi edhe paraqitje të rëndësishme në UEFA Champions League.
Pas lajmit të trishtë, Olympiacosi publikoi një mesazh prekës në nder të ish-lojtarit të tyre.
“Klubi Olympiacos, me një ndjenjë hidhërimi, i jep lamtumirën një njeriu dhe futbollisti të madh, Paraskevas Antzas, i cili nderoi fanellën bardhekuqe me pasion, forcë dhe dinjitet. Prania e tij la një përshtypje të fortë në fushën e lojës dhe tek të gjithë ata që e njihnin”, thuhej në deklaratën e klubit.
Karrierën e tij Antzas e nisi te Pandramaikos, përpara se të spikaste me paraqitjet te Xanthi. Në vitin 1998 ai realizoi transferimin e madh te Olympiacosi, ku fitoi pesë tituj kampion radhazi.
Në vitin 2003, pavarësisht suksesit të madh, ai njoftoi papritur tërheqjen nga futbolli për arsye familjare, por më vonë u rikthye në fushë me klubin e qytetit të tij, Doxa Drama.
Antzas humbi triumfin historik të Greqisë në UEFA Euro 2004, megjithëse kishte luajtur rol të rëndësishëm në kualifikuese. Më pas ai u rikthye te Xanthi, ndërsa në vitin 2007 u rikthye sërish te Olympiacosi, ku edhe mbylli karrierën dy vite më vonë.
I preferuari i tifozëve zhvilloi afro 200 ndeshje me Olympiacosin, përfshirë 25 paraqitje në Ligën e Kampionëve. Ai veshi gjithashtu 26 herë fanellën e kombëtares greke dhe mori pjesë në UEFA Euro 2008.
