Përgatitja e Brazilit për Kupën e Botës në futboll është e mbuluar me një mister në lidhje me gjendjen fizike të Neymar. Lojtari u pa duke çaluar në momentin që zbriti nga avioni, ndërkohë që ai është ende në fazë rikuperimi.
Trajneri Carlo Ancelotti hedh poshtë dyshimet në lidhje me dëmtimin dhe rikuperimin e Neymar: “Ai do të jetë gati sa më shpejt të jetë e mundur, ne nuk do të ndryshojmë askënd në listën e kombëtare. Ai do të qëndrojë këtu”.
Lojtari i Santos pësoi një dëmtim në pulpë që ngriti alarmin në kampin brazilian. Carlo Ancelotti po qetëson atmosferën dhe po jep të dhëna se kur do të kthehet lojtari, që humbi miqësoren kundër Panamasë, por nuk do të luajë as në miqësoren tjetër ndaj Egjiptit.
“Ne mendojmë se Neymar do të rikuperohet dhe do të jetë gati sa më shpejt të jetë e mundur. Ai po punon mirë, është entuziast. Për të qenë të qartë, ai do të jetë me ne deri në ditën kur të rikuperohet dhe të jetë i disponueshëm”, tha trajneri italian.
“Mendojmë se ai mund të rikuperohet për ndeshjen e parë kundër Marokut. Ose, maksimumi, për ndeshjen e dytë, atë ndaj Haiti.
E përsëris, nuk do të ndryshojmë askënd nga lista me 26 lojtarë”, deklaroi Ancelotti.
“Para thirrjes, morëm një deklaratë nga Santos ku thuhej se lojtari kishte një problem të vogël. Lojtari u thirr sepse stafi mendonte se ai e meritonte. Thashë se mund të thërrisja një lojtar që nuk ishte 100% në formë dhe që do të ishte gjatë Kupës së Botës”, tha Ancelotti.
