Si President i FIFA-s, Gianni Infantino ka qenë një figurë e pranishme pothuajse në çdo moment të Botërorit 2026, por duket se fakti që ai shfaqet kaq shpesh nuk është rastësi.
Infantino është përfshirë në disa polemika gjatë mandatit të tij si president i FIFA-s, ndërsa përfiton një pagë marramendëse për rolin e tij në organizimin dhe zhvillimin e Kupës së Botës.
Veçanërisht, qëndrimi i tij lidhur me pauzat për hidratim ka zemëruar shumë tifozë të futbollit. Ai ka mbrojtur me këmbëngulje zbatimin e tyre, madje ka pretenduar se ato e ndihmuan edhe Anglinë në barazimin dramatik ndaj Kongos DR.
Pavarësisht rezultatit, tifozët këmbëngulën se nuk është detyra e tij të “ndryshojë futbollin”, por pauzat prej tre minutash do të vazhdojnë në çdo ndeshje për të garantuar, sipas FIFA-s, “barazinë” e turneut.
Megjithatë, në përgjithësi, presidenti i FIFA-s ka ofruar një spektakël në SHBA, Kanada dhe Meksikë, ndërsa turneu po shkon drejt kulmit të tij, me fytyrën e Infantinos që shfaqet vazhdimisht në qendër të vëmendjes. Dhe kjo nuk është rastësi, pasi ekziston një arsye pse ai shihet në tribunat e pothuajse çdo ndeshjeje.
Teksa zyrtari i njohur vazhdon të shfaqet në ekranet gjigante, tifozët kanë filluar të pyesin pse ai shfaqet kaq shpesh, sikur të ishte “ulur në fronin e tij të FIFA-s”, disa herë gjatë një ndeshjeje.
Sipas prezantuesit të “Copa90”, Eli Mengem, në fakt ekziston një klauzolë në kontratat e transmetuesve, si p.sh. “FOX Sports”, që i detyron ata të fokusojnë kamerat te Infantino gjatë ndeshjeve.
“Më ka thënë një person shumë i besueshëm në botën e transmetimeve se përgjigjja është po, një herë në secilën pjesë. Megjithatë, nuk e shfaqin në ekranet e stadiumit për shkak të vërshëllimave”, shkroi ai në X.
Kjo përputhet me raportimet e revistës “The New Yorker”, e cila kishte pretenduar se gjatë Botërorit të Katarit në vitin 2022, “regjisorët e transmetimit zyrtar të turneut ishin udhëzuar ta shfaqnin Infantinon në tribunë një herë për çdo ndeshje dhe jo në momentet kur ai po shikonte telefonin”.
Sipas raportimeve, kjo praktikë është rinovuar edhe për Botërorin e këtij viti.
Në Katar, Gianni Infantino ishte i pranishëm pothuajse kudo falë përmasave të vogla të vendit, që e bënin të lehtë lëvizjen mes stadiumeve.
Me Botërorin 2026 të shpërndarë në SHBA, Meksikë dhe Kanada, Infantino nuk ka mundur të ndjekë çdo ndeshje, por ka qenë po aq aktiv në udhëtimet e tij.
Sipas raportimeve, ai ka përshkuar tashmë rreth 31 mijë milje me avion privat, duke ndjekur të paktën një ndeshje në ditë, falë fluturimeve të ofruara nga Qatar Airways.
Vetëm gjatë pesë ditëve të para të turneut, ai udhëtoi nga Mexico City në Guadalajara, më pas në Los Angeles, San Francisco, Vancouver, Miami, Seattle dhe sërish në Los Angeles.
Me kalimin e Botërorit në fazat më të avancuara me eliminim direkt dhe me më pak ndeshje në program, do të jetë edhe më e lehtë për presidentin e FIFA-s të jetë i pranishëm në stadiume, ku pritet të shihet edhe përkrah Presidentit të SHBA-së, Donald Trump, në fazat përmbyllëse të turneut.
