Sulmuesi i Argjentinës, Lautaro Martinez, u hodh mbi tabelat reklamuese për të festuar me tifozët pasi shënoi golin e tretë në fitoren ndaj Zvicrës të shtunën.
Goli i dytë personal i Martinezit në këtë Kupë Bote siguroi kualifikimin e kampionëve në fuqi në gjysmëfinale, ku do të përballen me Anglinë e drejtuar nga Thomas Tuchel të mërkurën në Atlanta.
Megjithatë, shumë tifozë kanë ngritur pyetjen nëse kapiteni i Interit duhet të jetë i disponueshëm për sfidën ndaj “Tre Luanëve”.
Argjentina po udhëhiqte 2-1 ndaj Zvicrës me dhjetë lojtarë në vazhdime falë një supergoli të yllit të Atletico Madridit, Julian Alvarez.
Në minutat shtesë, Martinez shënoi edhe golin e tretë, duke vulosur përfundimisht fitoren në Kansas City.
Pas golit, ai u hodh mbi tabelën elektronike reklamuese për të festuar me tifozët, pasi kishte dërguar topin në rrjetë pas një kundërsulmi.
Normalisht, një festim i tillë, ku lojtari hidhet në tribuna ose afrohet te tifozët, mund të ndëshkohet me karton të verdhë.
Nëse Martinez do ta kishte marrë atë karton, ai do të ishte i dyti për të në ndeshje, çka do të nënkuptonte përjashtim me karton të kuq dhe pezullim automatik për një ndeshje, duke humbur kështu gjysmëfinalen ndaj Anglisë.
Megjithatë, arbitri i takimit, Joao Pinheiro, nuk e ndëshkoi sulmuesin 28-vjeçar, gjë që ngjalli diskutime për mungesën e një kartoni të verdhë.
Në fakt, ndryshe nga sa mendojnë shumë, një festim i tillë nuk sjell automatikisht karton të verdhë.
Pinheiro kishte të drejtën të përdorte diskrecionin e tij, sipas Ligjeve të Lojës, rregullores zyrtare të futbollit.
Festimi i golave rregullohet nga Ligji 12, i cili trajton faullet dhe sjelljet e pahijshme, duke përcaktuar rastet kur një lojtar duhet ose jo të ndëshkohet gjatë festimit.
Në Ligjin 12 thuhet: “Lojtarët mund të festojnë kur shënohet një gol, por festimi nuk duhet të jetë i tepruar. Festimet e koreografuara nuk inkurajohen dhe nuk duhet të shkaktojnë humbje të panevojshme kohe.
Largimi nga fusha për të festuar një gol nuk përbën në vetvete arsye për karton të verdhë, por lojtarët duhet të rikthehen sa më shpejt në fushë.
Një lojtar duhet të ndëshkohet me karton të verdhë, edhe nëse goli anulohet, në rastet kur:
Hipën mbi gardhin rrethues dhe/ose afrohet te spektatorët në mënyrë që krijon probleme sigurie.
Sillet në mënyrë provokuese, përçmuese ose nxitëse.
Mbulon kokën ose fytyrën me maskë apo objekt të ngjashëm.
Heq fanellën ose mbulon kokën me fanellë.”
Martinez nuk përmbushi asnjërin prej këtyre kritereve. Faktori vendimtar ishte mënyra se si ai iu afrua tifozëve pas portës së Zvicrës, pa krijuar probleme sigurie apo sjellje provokuese.
Kartoni i verdhë që ai kishte marrë më herët në vazhdime për një faull ndaj mbrojtësit zviceran Manuel Akanji nuk do ta pengojë të luajë në gjysmëfinale, nëse Argjentina përballet me Anglinë.
Për shkak të zgjerimit të Kupës së Botës në 48 skuadra, FIFA ka vendosur një amnisti të dytë për kartonët e verdhë gjatë turneut.
Kartonët e verdhë u fshinë fillimisht pas fazës së grupeve dhe më pas edhe pas çerekfinaleve, me qëllim që një karton i verdhë në gjysmëfinale të mos sjellë pezullim për finalen ose ndeshjen për vendin e tretë pas një faze eliminatore shumë më të gjatë.
Tek Anglia, Jude Bellingham, Nico O’Reilly, Declan Rice dhe Marc Guehi shmangën marrjen e kartonëve të verdhë në fitoren çerekfinale ndaj Norvegjisë të shtunën.
Ashtu si Martinez, edhe ata do të jenë të gatshëm për gjysmëfinalen. Ndërkohë, Jarell Quansah do të vuajë ndeshjen e dytë të pezullimit të tij prej dy ndeshjesh.
