Mungesa e minutave për Kobbie Mainoo në Kupën e Botës ka shkaktuar shumë diskutime, por tashmë kanë dalë detaje të reja që zbulojnë arsyet e vendimit të trajnerit Thomas Tuchel.
Mesfushori i Manchester United ishte konsideruar një nga lojtarët më premtues të Anglisë pas paraqitjeve të tij në fundin e sezonit 2025/26. Vetë Tuchel kishte vlerësuar më herët rëndësinë e tij për skuadrën, duke e përfshirë fillimisht në listat e kombëtares dhe më pas në grupin përfundimtar prej 26 lojtarësh për Botërorin.
Shumë tifozë prisnin që 20-vjeçari të aktivizohej përkrah Declan Rice dhe Elliot Anderson, sidomos kur Rice po përballej me probleme fizike. Megjithatë, Tuchel vendosi të vazhdonte me mesfushorin e Arsenalit.
Sipas raportimeve të mediave britanike, trajneri gjerman nuk ishte bindur nga paraqitjet e Mainoo gjatë seancave stërvitore në kampin e Anglisë. Brenda stafit të kombëtares ekzistonte bindja se mesfushori nuk kishte bërë mjaftueshëm për të fituar besimin e trajnerit.
Raportohet gjithashtu se Mainoo ishte zhgënjyer nga situata gjatë turneut dhe shpesh largohej i vetëm nga stadiumi pas ndeshjeve, me kufje në vesh.
Edhe më herët, ish-trajneri i Manchester United, Ruben Amorim, kishte kritikuar punën e Mainoo në stërvitje, ndërsa disa burime pranë kombëtares angleze kanë bërë të ditur se Tuchel preferoi alternativa të tjera, madje duke përdorur edhe Reece James në mesfushë në momentet kur Rice mungonte.
Kështu, vendimi i Tuchel për të mos aktivizuar Mainoo duket se nuk lidhej me mungesën e besimit te talenti i tij, por me vlerësimin e trajnerit për formën dhe paraqitjet e tij gjatë përgatitjeve për Botërorin.
