Qeveria e Malit të Zi i propozoi Parlamentit të anullojë tenderin për dhënien me koncesion të dy aeroporteve kryesore ndërkombëtare të vendit, Podgoricën dhe Tivatin. Shkaku për dështimin e tenderit të stërzgjatur është tërheqja e kompanisë së shpallur fituese, koreanes Incheon, e cila informoi zyrtarisht qeverinë pak ditë më parë se po dilte nga procesi i koncesionit.
Ofertuesi i renditur i pari në tender u tërhoq nga procedura sepse Ministria e Transportit mbajti qëndrimin e saj se elementë të rëndësishëm të tenderit dhe ofertës nuk mund të ndryshohen në këtë fazë, veçanërisht detyrimi për të paguar një tarifë koncesioni paraprak prej 100 milionë eurosh brenda 30 ditëve nga nënshkrimi i kontratës së konçesionit.
Një burim për “Vijesti” shpjegoi se dega ekzekutive nuk ishte gati t’ia jepte koncesionin ofertuesit të renditur të dytë, Corporation America Airports (CAAP), sepse oferta e saj financiare nuk ishte e pranueshme, kështu që u vendos t’i propozohej Parlamentit si dhënës i kontratës anulimin e tenderit të shpallur në vitin 2019.
Koreanët, nëpërmjet ofertës së tyre financiare, ofruan 100 milionë në tarifa fikse për aeroportet dhe 35 përqind të të ardhurave vjetore si një tarifë koncesioni variabël. CAAP ofroi 101 milionë në tarifa fikse dhe pak më shumë se 17 përqind të të ardhurave vjetore si një tarifë variabël.
