Trajneri i Chelseat, Xabi Alonso, ka deklaruar se e ka lënë pas periudhën e tij te Real Madridi, duke theksuar se është jashtëzakonisht i entuziazmuar për projektin e ri me “Blutë”.
Spanjolli e nisi sezonin e kaluar në stolin e Real Madridit, por u shkarkua në mes të sezonit pas humbjes ndaj Barcelonës në Superkupën e Spanjës.
Chelsea më pas konfirmoi emërimin e tij si trajner për sezonin e ri, pas një serie rezultatesh zhgënjyese që e lanë klubin në vendin e dhjetë në Premier League.
Duke folur nga kampi stërvitor parasezonal i Chelseat, Alonso tha:
“Fatmirësisht, nuk kam shumë plagë në karrierën time profesionale.”
Duke folur për përvojën te Real Madridi, sipas gazetës angleze The Sun, ai shtoi:
“Po, mora një plagë. Tani ajo është shëruar dhe jam jashtëzakonisht i emocionuar dhe i vendosur ta shijoj këtë hap të ri, ashtu siç e shijova kur nisa te Madridi. Por duhet të ecësh përpara.”
Ai vazhdoi: “Kur shoh pas, përfitoj nga gjërat pozitive dhe nga ato që nuk funksionuan. Kam qenë shumë kritik ndaj vetes, duke menduar se çfarë mund të kisha bërë më mirë, sepse padyshim nuk shkoi ashtu siç e prisja. Por jeta vazhdon dhe duhet të ecësh drejt sfidave të reja.”
Alonso shtoi se përvoja te Real Madridi i dha shumë mësime.
“Ka shumë përvoja, mënyra si u desh të përshtatesha, disa gjëra që funksionuan dhe disa që nuk funksionuan, si në aspektin e lojës, ashtu edhe në menaxhimin e lojtarëve. Është një përzierje e të gjithave.”
Si një ish-mesfushor me vizion të jashtëzakonshëm, Alonso pati mundësinë të punonte me disa nga trajnerët më të mëdhenj të futbollit, si Carlo Ancelotti, Jose Mourinho, Pep Guardiola dhe Rafael Benitez.
Ai zbuloi se pikërisht gjatë kohës te Bayern Munich, nën drejtimin e Guardiolës, nisi të interesohej seriozisht për trajningun.
“Ishim shumë të afërt. Isha shumë kureshtar.”
“Isha në një fazë të karrierës sime ku mund të shkoja në zyrën e tij dhe t’i thosha: ‘Pep, pse po ndodh kjo? Cili është plani i lojës?’ Ndoshta kur isha 20 vjeç nuk do ta kisha atë vetëbesim për t’i bërë këto pyetje trajnerit.”
“Por në atë moment, falë besimit që kishim, ndjeja se duhej ta bëja dhe doja ta bëja.”
Pikërisht kjo përvojë, e kombinuar me sukseset e tij të hershme si trajner, e bindi Chelsean se ai ishte njeriu i duhur për ta rikthyer ekipin në rrugën e suksesit pas një sezoni të vështirë.
“Dëshira duhet të vijë nga këtu,” tha ai, duke treguar kokën dhe zemrën.
“Duhet të vijë nga zemra.”
Ai shtoi: “E pashë se momenti ishte i duhur si për klubin, ashtu edhe për mua. Është një mundësi shumë e mirë. Është një skuadër që ka luajtur futboll shumë të mirë jo shumë kohë më parë dhe situata nuk ishte aq e keqe sa dukej në fund të sezonit të kaluar.”
“Ka potencial të madh për përmirësim dhe do të shohim sa kohë do të duhet. Ndjeva se ishte një mundësi që ta shijoja punën si trajner.”
Pas emërimit të tij, Chelsea afroi edhe veteranët Danny Welbeck dhe Jordan Henderson, ky i fundit fitues i Premier League dhe Ligës së Kampionëve me Liverpoolin.
Alonso theksoi rëndësinë e ekuilibrit brenda skuadrës.
“Duhet të kesh ekuilibrin e duhur mes personaliteteve dhe fazave të pjekurisë, nga lojtarët në fillim të të njëzetave deri te ata në fillim të të tridhjetave, si dhe futbollistë në etapa të ndryshme të karrierës së tyre.”
“Nuk ekziston një formulë për këtë, por ekziston një ndjesi.”
Në fund, ai përmbylli: “Për mua, kjo është po aq e rëndësishme sa taktikat. Së pari vjen fryma e ekipit. Pastaj vjen futbolli i mirë. Dhe në fund vijnë fitoret”.
