Kostumi ikonik i bardhë që veshi John Travolta në filmin “Saturday Night Fever” pritet të arrijë çmimin deri në 400 mijë dollarë në një ankand të objekteve të kinemasë.
Kostumi, i veshur gjatë skenës së paharrueshme të garës së diskos dhe i shfaqur në shumë prej materialeve më të njohura promocionale të filmit, është objekti kryesor i një ankandi me relike të industrisë së argëtimit, i cili pritet të gjenerojë rreth 10 milionë dollarë.
Ankandi i organizuar nga Propstore përfshin më shumë se 1700 objekte origjinale nga filmat dhe televizioni, mes tyre rekuizita, kostume, materiale produksioni, sende të firmosura dhe relike të tjera të botës së argëtimit.
Ndër objektet më të veçanta janë edhe kostumi i Frank the Rabbit nga Donnie Darko (vlerësuar 100.000–200.000 dollarë), dhëmbët e “njeriut-mace” nga videoklipi Thriller i Michael Jacksonit (20.000–40.000 dollarë) dhe një Golden Snitch origjinal nga Harry Potterand the Sorcerer’s Stone (2001), me vlerë të parashikuar 25.000–50.000 dollarë.
Po ashtu, ndër objektet më të vlefshme renditen fosili me mushkonjën në qelibar nga skena hapëse e Jurassic Park (100.000–200.000 dollarë), i identifikuar si i njëjti që shfaqet në film, si edhe sëpata e përdorur nga kaskadorët në The Shining (50.000–100.000 dollarë).
Brandon Alinger, drejtori operativ i Propstore, tha: “Në Propstore jemi të përkushtuar të ruajmë dhe të ndajmë historinë e filmit dhe televizionit përmes objekteve origjinale që ndihmuan në sjelljen në jetë të këtyre historive.
“Nga kostumi ikonik i bardhë i John Travoltës në Saturday Night Fever dhe fosili me qelibar nga Jurassic Park, deri te një koleksion i jashtëzakonshëm objektesh të firmosura, ky ankand pasqyron larminë e jashtëzakonshme të relikeve të industrisë së argëtimit dhe u jep koleksionistëve mundësinë të zotërojnë pjesë autentike të filmave, artistëve dhe momenteve që vazhdojnë të frymëzojnë publikun në mbarë botën.”
Ankandi katërditor i Propstore në Los Anxhelos do të zhvillohet nga 26 deri më 29 gusht, duke mbledhur në një vend disa nga objektet më të rralla dhe më të kërkuara të historisë së kinemasë dhe televizionit.
