Shërbimi britanik i inteligjencës së jashtme, MI6, është renditur si agjencia më e fuqishme e spiunazhit në Europë, duke lënë pas Francën dhe Holandën, sipas një vlerësimi ndërkombëtar.
MI6 grumbulloi 251 pikë në këtë studim dhe u vlerësua veçanërisht për aftësinë e tij në rekrutimin e informatorëve të nivelit të lartë dhe depërtimin në radhët e elitave drejtuese në Rusi, Kinë, Iran dhe Turqi. Vlerësimi u krye nga 60 profesionistë të inteligjencës nga 25 vende të ndryshme.
Drejtoria e Përgjithshme e Sigurisë së Jashtme të Francës (DGSE) u rendit e dyta me 169 pikë, falë shtrirjes globale dhe kapaciteteve operacionale, raportoi The Times.
Pesëshen e parë e plotësojnë Holanda, Ukraina dhe Gjermania, ndërsa shërbimi i inteligjencës së Sllovakisë u vlerësua si më i dobëti.
Studimi u realizua nga revista franceze L’Express, e cila kontaktoi profesionistë të shërbimeve të inteligjencës së vendeve aleate perëndimore për të vlerësuar homologët e tyre.
Britania ishte vendi i parë që paralajmëroi Ukrainën për mundësinë e pushtimit rus, i cili nisi në shkurt të vitit 2022, dhe që prej atëherë ka qenë një nga aleatët më të fortë të Kievit.
Ralph Goff, ish-drejtues i operacioneve për Europën dhe Euroazinë në CIA, deklaroi për revistën:
“Britanikët janë në krye sa i përket çështjes së Ukrainës. Ne jemi menjëherë pas tyre.”
Edhe Robert Gorelick, ish-shef i një stacioni të CIA-s, tha:
“Mbretëria e Bashkuar ka me diferencë shërbimet sekrete më të fuqishme në Europë. MI6 është i jashtëzakonshëm.”
Vitin e kaluar, Blaise Metreweli u bë gruaja e parë që drejton MI6, duke zëvendësuar Sir Richard Moore.
Një ish-drejtues i DGSE-së tha:
“Britanikët kanë aftësinë të mendojnë në afat të gjatë, duke investuar te burimet njerëzore për një horizont 10-vjeçar, disi si rusët. Gjithashtu kanë një prirje për operacione të fshehta.”
DGSE, i paraqitur edhe në serialin francez “The Bureau”, u vlerësua si një nga shërbimet më të mira në botë për luftën kundër terrorizmit.
Shërbimi francez është i njohur për operacionet e tij klandestine për “eliminimin” e personave të konsideruar kërcënim për sigurinë e Francës. Ish-presidenti francez François Hollande ka deklaruar publikisht se kishte autorizuar të paktën 40 operacione për vrasjen e objektivave me “vlerë të lartë” në Lindjen e Mesme dhe Afrikë, sipas një libri të botuar në vitin 2017.
Një drejtues i inteligjencës polake i tha L’Express:
“Është i vetmi shërbim në Europën kontinentale me një shtrirje pothuajse globale. Ata kombinojnë mbledhjen teknike të informacionit, inteligjencën njerëzore dhe aftësitë për operacione të drejtpërdrejta.” /The Guardian/
