Aktori i njohur amerikan Morgan Freeman ka zgjeruar karrierën e tij në një drejtim të ri, duke publikuar në moshën 89-vjeçare albumin e tij të parë muzikor, të titulluar Morgan Freeman’s Symphonic Blues Experience.
Albumi është publikuar më 7 gusht nga Decca Records dhe përmban 12 këngë, të cilat sjellin një udhëtim në historinë e blues-it dhe në veçanti në traditën muzikore të Mississippi-t, vendi me të cilin Freeman ka një lidhje të hershme.
Në projekt marrin pjesë disa prej emrave të njohur të blues-it, mes tyre Taj Mahal, Keb’ Mo’ dhe Shemekia Copeland. Në disa prej regjistrimeve është përfshirë edhe Chineke Orchestra.
Projekti ishte prezantuar për herë të parë në muajin qershor, së bashku me publikimin e këngës Death Letter Blues, një version i ri i këngës së njohur të Son House, ku Taj Mahal interpreton në vokal dhe kitarë.
Për Morgan Freeman, lidhja me blues-in daton që nga fëmijëria. Aktori është rritur në Mississippi dhe ka treguar ndër vite se kjo muzikë ka qenë pjesë e rëndësishme e jetës së tij. Pasioni për këtë zhanër është shndërruar edhe në një angazhim konkret për ruajtjen dhe promovimin e trashëgimisë së blues-it.
Freeman është gjithashtu bashkëpronar i Ground Zero Blues Club në Clarksdale, Mississippi, një prej ambienteve të njohura të lidhura me traditën e blues-it në këtë zonë.
Me këtë projekt të ri, aktori i njohur për dhjetëra role në kinema dhe për zërin e tij karakteristik po i shton një tjetër kapitull karrierës, këtë herë përmes muzikës dhe historisë së blues-it.
