Një operacion i përbashkët mes autoriteteve spanjolle dhe portugeze ka goditur një rrjet të dyshuar ndërkombëtar të trafikut të drogës, duke çuar në sekuestrimin e sasive të mëdha të kokainës dhe arrestimin e tre personave.
Operacioni u zhvillua më 13 gusht, pas një hetimi të përbashkët mbi dyshimet se grupi transportonte sasi të konsiderueshme kokaine mes Portugalisë dhe zonës së Costa del Sol në Spanjë.
Hetimet nisën pasi autoritetet spanjolle morën informacion për një furgon që dyshohej se transportonte drogë nga Portugalia drejt Costa del Sol. Gjurmët çuan policinë në një pronë në Torremolinos, ndërsa paralelisht u mbajtën nën vëzhgim disa automjete të dyshuara se përdoreshin për transportimin dhe magazinimin e lëndës narkotike.
Një prej automjeteve u ndoq deri në Marbella, ku u ndalua nga policia. Gjatë kontrollit, autoritetet sekuestruan rreth 2 tonë kokainë dhe arrestuan një person.
Në të njëjtën kohë, kontrolli në pronën e identifikuar në Torremolinos çoi në gjetjen e rreth 1.7 tonëve kokainë. Një person tjetër u arrestua në vend, ndërsa policia sekuestroi edhe një pistoletë të mbushur.
Operacioni shtrihet edhe në Portugali
Hetimet vijuan në Portugali, ku Policia Gjyqësore identifikoi furgonin e dyshuar se ishte përdorur për transportimin e drogës, në momentin kur po kthehej në drejtim të Spanjës.
Automjeti u ndalua dhe drejtuesi i tij u arrestua. Brenda furgonit, sipas informacionit të përcjellë, u gjetën rreth 1.5 tonë kokainë, si dhe dy armë me tytë të gjatë. Shoferi u bë personi i tretë i arrestuar në kuadër të operacionit.
Në total, autoritetet sekuestruan gjithashtu tre armë, dy automjete dhe rreth 1,100 euro para cash. Gjatë kontrolleve u gjetën kamera sigurie, pajisje për shikim natën dhe mjete komunikimi, të cilat po analizohen për të zbardhur strukturën dhe mënyrën e funksionimit të rrjetit.
Tre të arrestuarit dyshohet se përballen me akuza që lidhen me pjesëmarrjen në organizatë kriminale, trafik droge, armëmbajtje pa leje, sulm ndaj punonjësve të policisë dhe shkelje të rregullave të sigurisë rrugore.
