Durrësi vijon të jetë një nga qytetet shqiptare më tërheqëse për blerësit e huaj që kërkojnë të investojnë në prona, veçanërisht në apartamente pranë zonave bregdetare. Sipas një studimi të Investropa, në vitin 2026 procesi i blerjes së një apartamenti në Durrës nga një i huaj është relativisht i arritshëm, sidomos kur bëhet fjalë për një pronë të përfunduar dhe me dokumentacion të qartë.
Megjithatë, studimi nënvizon se blerja e një prone nuk është një proces që mund të kryhet pa verifikime të hollësishme. Për blerësit e huaj, disa nga vështirësitë kryesore lidhen me dokumentacionin lokal, verifikimin e statusit të pronës, procedurat bankare dhe dallimin mes asaj që është ligjërisht e përfunduar dhe asaj që mund të jetë vetëm pjesë e ofertës së marketingut.
Çfarë pronash mund të blejnë të huajt?
Në përgjithësi, blerësit e huaj mund të blejnë apartamente dhe pjesën më të madhe të pronave rezidenciale në Shqipëri. Megjithatë, situata ndryshon kur bëhet fjalë për toka bujqësore apo prona që përfshijnë sipërfaqe të konsiderueshme toke.
Në këto raste mund të ketë kufizime të tjera ligjore ose nevojë për krijimin e një strukture kompanie, çka e bën procesin më kompleks për një investitor të huaj.
Dokumentet, një nga pengesat kryesore
Një prej problemeve më të zakonshme të evidentuara nga studimi është dokumentacioni. Për blerësit e huaj, dokumentet që nuk janë të përkthyera ose që nuk janë të qarta mund ta bëjnë procesin më të vështirë dhe të kërkojnë kohë shtesë për verifikim.
Një tjetër çështje është statusi kadastral i pronës. Përpara blerjes, është e rëndësishme që investitori të kuptojë nëse prona është e regjistruar dhe nëse dokumentacioni përkatës përputhet me atë që i është prezantuar nga shitësi ose agjenti.
Studimi evidenton gjithashtu rrezikun e blerjeve në distancë, veçanërisht kur investitori mbështetet vetëm te informacioni i marrë online ose te materialet promocionale.
Jo gjithçka që reklamohet është e njëjtë me atë që është përfunduar
Një tjetër problem i përmendur nga Investropa lidhet me pretendimet e marketingut për pronat, veçanërisht në projektet që shiten përpara përfundimit.
Për një blerës të huaj mund të jetë e vështirë të dallojë nëse një projekt është realisht i përfunduar dhe i dokumentuar ligjërisht apo nëse bëhet fjalë për një pronë që është ende në proces zhvillimi.
