Holanda nuk do të marrë pjesë në Festivalin e Këngës në Eurovision të vitit të ardhshëm , njoftoi shërbimi i saj publik, duke shpjeguar se konkursi , për shkak të përçarjeve të shkaktuara nga lufta në Gaza, “nuk mund të konsiderohet më neutral”.
“Është e pamohueshme që konfliktet ndërkombëtare po ndikojnë gjithnjë e më shumë në konkurs, duke dëmtuar karakterin e tij neutral. Prandaj, Konkursi i Këngës në Eurovision është bërë një platformë përçarëse”, tha drejtori ekzekutiv i AVROTROS, Tako Zimmerman.
Eurovision është përballur me një valë bojkotesh vitet e fundit për shkak të pjesëmarrjes së Izraelit . Organizatorët njoftuan më parë këtë muaj se asnjë vend që merr pjesë në një konflikt të armatosur nuk do të lejohet të presë konkursin, raporton Euronews.com.
“Megjithatë, ndryshimet e njoftuara së fundmi nuk ofrojnë arsye të mjaftueshme për të besuar se karakteri i pavarur dhe neutral i Konkursit të Këngës në Eurovision është rivendosur”, thotë AVROTROS.
Izraeli ishte pranë fitores si në vitet 2025 ashtu edhe në 2026, duke përfunduar i dyti të dyja herët.
Eurovision 2027 do të mbahet më 15 maj në Burgas, një qytet në bregdetin e Detit të Zi në Bullgari. Ndërkohë, Unioni Evropian i Transmetimeve ka ftuar Kanadanë të marrë pjesë në konkursin e ardhshëm në Burgas.Do të jetë hera e parë që Bullgaria do të presë konkursin, pasi këngëtarja bullgare Darina Yotova, e njohur si Dara, fitoi këtë vit në Vjenë me këngën “Bangaranga”.
Që nga lançimi i tij në vitin 1956, Eurovision është bërë një nga ngjarjet më të mëdha muzikore në botë, duke ndihmuar grupin suedez ABBA të fitojë famë në mbarë botën dhe duke kontribuar në popullaritetin e artistëve si Celine Dion, Cliff Richard dhe Olivia Newton-John.
Konkursi i vitit 2026 u ndoq nga 131 milionë shikues, 35 milionë më pak se një vit më parë, pasi pesë vende bojkotuan Eurovisionin për shkak të pjesëmarrjes së Izraelit. Holanda, Islanda, Spanja, Irlanda dhe Sllovenia u tërhoqën nga konkursi, ndërsa tre vendet e fundit refuzuan madje të transmetojnë Eurovisionin.
