Seanca e jashtëzakonshme e Kuvendit të Malit të Zi, në rend dite të së cilës ishte iniciativa për shkarkimin e kryetarit të parlamentit, Andrija Mandiç, nuk u mbajt sot për shkak të mungesës së kuorumit.
Iniciativa për shkarkimin e Mandiçit, e propozuar nga Partia Demokratike e Socialistëve (DPS), ishte nënshkruar nga 35 deputetë.
Shkak për kërkesën ishte ngushëllimi që Mandiqi i kishte shprehur familjes së ish-komandantit serb të dënuar për krime lufte, Ratko Mladiq, shkruan vijesti.me.
Seanca u shoqërua me përplasje mes Mandiqit dhe deputetëve të opozitës. Mandiqi u largua nga salla para fillimit zyrtar të seancës, ndërsa gazetarëve, kameramanëve dhe fotoreporterëve nuk iu lejua hyrja në sallën plenare.
Deputetët e DPS-së kërkuan transmetim të drejtpërdrejtë televiziv dhe hyrjen e mediave në sallë, në mënyrë që publiku të shihte se cilët deputetë ishin të pranishëm dhe nëse ekzistonte kuorumi për zhvillimin e seancës.
Pas largimit të Mandiqit, deputetë të opozitës i thanë atij “u arratis”, ndërsa DPS e akuzoi kryetarin e Kuvendit se po pengonte zhvillimin e seancës.
Kreu i DPS-së, Danijel Zhivkoviç, deklaroi se partia e tij do të ndërpresë bashkëpunimin institucional me qeverinë dhe shumicën parlamentare derisa të mbahet seanca ku deputetët do të mund të votojnë për shkarkimin e Mandiqit.
