Legjenda braziliane e futbollit, Roberto Carlos, ka rrëfyer një nga periudhat më të vështira të jetës së tij, duke zbuluar një krizë të rëndë financiare që, sipas tij, i përmbysi jetën brenda vetëm pak orësh.
Ish-mbrojtësi i majtë i Real Madridit dhe një prej figurave më të njohura të kombëtares braziliane ka treguar se, pavarësisht pasurisë së madhe të krijuar gjatë një karriere të jashtëzakonshme, në një moment u përball me një kolaps financiar që e la pa kontroll mbi pjesën më të madhe të pasurisë së tij.
Sipas rrëfimit të tij, gjithçka lidhej me një konflikt me një ish-agjent, të shoqëruar edhe nga një problem serioz familjar. Roberto Carlos tha se brenda një nate u përball me një numër të madh dokumentesh dhe detyrimesh financiare, për ekzistencën e të cilave, sipas tij, nuk kishte qenë në dijeni.
Goditja ishte e jashtëzakonshme. Braziliani pretendon se humbi rreth 99 për qind të gjithçkaje që kishte fituar gjatë karrierës së tij në futboll, duke u përballur papritur me një situatë që e detyroi të merrte vendime drastike për të rimarrë kontrollin mbi jetën e tij financiare dhe familjare.
“Pata një problem serioz me një ish-agjentin tim, shoqëruar me një telash shumë të madh familjar. Të enjten shkova në shtrat në mesnatë, ndërsa të premten në mëngjes u zgjova përballë një pirgu me letra, ekzistencën e të cilave nuk e dija. Aty humba çdo kontroll mbi historinë time, mbi gjithçka që kisha ndërtuar në futboll. Brenda një dite humba 99% të gjithçkaje që kisha fituar”, ka rrëfyer Roberto Carlos.
Pavarësisht situatës dramatike, ish-futbollisti brazilian arriti të ristrukturonte financat dhe situatën e tij familjare.
“Më pas, fatmirësisht, ia dola të ristrukturoja situatën time financiare dhe atë familjare”, shtoi ai.
Roberto Carlos ndërtoi një karrierë të lavdishme me Real Madridin dhe kombëtaren e Brazilit, duke fituar trofe të shumtë dhe duke u konsideruar për vite me radhë si një prej mbrojtësve më të mirë në botë.
Megjithatë, rrëfimi i tij tregon se edhe pas një karriere të mbushur me trofe dhe miliona, jeta jashtë fushës mund të sjellë kriza të papritura dhe pasoja të mëdha financiare.
