Nga të gjitha tendencat e reja të modës këtë shtator, më e forta duket se është frymëzimi nga fshati britanik.
Mjafton të shohësh markat që e kanë vendosur jetën rurale në qendër të fushatave të tyre të reja. Kjo pritej nga Burberry, Barbour, Really Wild, Herd Knitwear dhe Fairfax & Favor. Por tani këtij trendi i janë bashkuar edhe marka si Jimmy Choo, Reiss, Me + Em, Hobbs dhe The White Company. Edhe Meghan dhe Harry, që deri vonë e kishin lidhur imazhin e tyre me Kaliforninë, po përqafojnë këtë estetikë.
Fshati është kthyer në gjuhën e re vizuale të luksit. Madje, edhe M&S e ka përfshirë këtë ide në fushatën e vet, me një modele pranë një dritareje që sheh nga fusha të gjelbra. Mesazhi duket i qartë: për britanikët, jeta rurale është një mënyrë të menduari, edhe nëse jeton në qendër të Londrës apo Cardiff-it.
Edhe hotelet e fshatit britanik, dikur të konsideruara si zgjedhje të vjetruara, janë bërë papritur shumë në modë. Kufiri mes stilit të qytetit dhe atij rural po zhduket.
Por pse fshati britanik është rikthyer kaq fuqishëm? Një pjesë e përgjigjes lidhet me suksesin e serialeve dhe programeve televizive. Traitors, me kështjellën madhështore në Skoci dhe veshjet e Claudia Winkleman-it, ka ndikuar në rikthimin e tweed-it, trikotazheve dhe veshjeve tradicionale të gjuetisë. Edhe sezonet e reja të The Gentlemen, Outrageous dhe Rivals kanë kontribuar në këtë estetikë.
Më shumë se kaq, në një kohë kur “luksi i qetë” është bërë i konsumuar dhe luksi i ekzagjeruar duket i pakëndshëm, jeta në fshat ofron një fantazi më të thjeshtë: një qen, një kopsht, çizme me baltë, perime, kuaj, miq që vijnë për fundjavë. Pasuria këtu nuk shfaqet, por duket sikur jetohet natyrshëm.
Kjo është edhe arsyeja pse stili rural është bërë më modern, veçanërisht falë Princeshës së Uellsit, Kate, e cila ka ndihmuar që xhaketat prej dylli, pardesytë, trikotazhet, çizmet dhe veshjet elegante të fshatit të duken bashkëkohore.
Dhe tani vjen edhe “çështja Meghan”. Një publiciste e një marke rurale tha se ndoshta nuk do t’i dërgonte produkte Dukeshës, sepse ajo është shumë përçarëse dhe marka do të duhej të “zgjidhte një krah”. Me sa duket, ky debat do të vazhdojë gjatë, në fshat.
