Ballina Aktualitet PS pritet të propozojë Idajet Beqirin për Avokat të Popullit, Ballanca jashtë...

PS pritet të propozojë Idajet Beqirin për Avokat të Popullit, Ballanca jashtë mandatit që në 2022

65
0

Me nisjen e sesionit të ri dhe të fundit parlamentar për këtë legjislaturë, mazhoranca pritet t’i rikthehet zgjedhjes së Avokatit të Popullit, pasi mandati i Avokates aktuale të Popullit, Erinda Ballanca, ka përfunduar që maj të vitit 2022. Zonja Ballanca qëndron prej më shumë se dy vitesh në detyrë, ndërkohë që mandati i ka përfunduar. Sipas burimeve, grupi parlamentar i Partisë Socialiste pritet të propozojë dhe mbështesë me firma avokatin e njohur Idajet Beqiri për postin e Avokatit të Popullit. Vitet e fundit Beqiri ka trazuar politikën e Tiranës me disa kallëzime penale në SPAK, për politikanë të nivelit të lartë, disa nga të cilat janë kthyer në akuza penale nga SPAK-u, siç është dosja për Ilir Metën dhe Monika Kryemadhin.

Sipas parashikimeve ligjore, vetëm kandidatët që marrin mbështetjen e 28 deputetëve do të kenë mundësinë të votohen në Kuvend dhe zgjidhet me 3/5 e të gjithë anëtarëve. Ky parashikim kërkon që kandidati për Avokat të Popullit duhet të ketë një mbështetje me votë në Kuvend përtej shumicës socialiste.

Në praktikën parlamentare të së shkuarës, Avokati i Popullit është propozuar përgjithësisht nga opozita, por këtë radhë, maxhoranca dhe rrymat e ndryshme brenda opozitës nuk kanë gjetur konsensus, duke shkelur afatet kushtetuese për zgjedhjen e kreut të ri të këtij institucioni.

Vakanca për Avokatin e ri të Popullit u shpall fillimisht nga Komisioni për Çështjet Ligjore më 30 mars 2022 pas përfundimit të mandatit të Erinda Ballancës. Thirrja u shty disa herë, ndërsa grupet parlamentare të dy partive të mëdha, Partisë Socialiste dhe Partisë Demokratike, deklaruan se po negocionin për një emër konsensual duke i qëndruar traditës politike për të mbështetur një emër që vjen nga opozita.

Por, me rikthimin e Sali Berishës në krye të PD, nongrata nga SHBA dhe Britania e Madhe për minimin e demokracisë në Shqipëri, duket se Edi Rama do t’a zgjedhë në mënyrë të njëanshme Avokatin e Popullit.