Kate Moss tërhoqi gjithë vëmendjen në Venecia, ku mori pjesë në eventin “Black Orchid Reserve” të Tom Ford, i mbajtur në koleksionin Peggy Guggenheim.
Supermodelja 51-vjeçare u shfaq me një bluzë argjendi të shndritshme dhe një fund elegant saten të zi, duke shkëlqyer përkrah modelit australian Jordan Barrett, 28 vjeç, të cilin e ka mbrojtur dhe promovuar prej vitesh në industrinë e modës.
Ndërsa Moss mahniti me paraqitjen e saj në event, ajo është gjithashtu në qendër të vëmendjes për një projekt të ri që lidhet me mikun e saj të ngushtë, legjendën e muzikës David Bowie, shkruan DailyMail.
Supermodelja ka marrë rolin e prezantueses në një seri me tetë episode për BBC Radio 6 Music dhe BBC Sounds, të titulluar David Bowie: Changeling.
Podcasti do të eksplorojë periudhën e transformimit artistik të Bowie-t mes viteve 1970–1975, duke përfshirë materiale të rralla nga arkivat, si dhe intervista të reja me artistë të njohur si Elton John, Iggy Pop, Robbie Williams, Boy George dhe Chrissie Hynde.
Duke folur për projektin, Moss u shpreh: “David Bowie ishte shumë më tepër se një mik, ai ishte një enigmë. Jam e lumtur që kam mundësinë të ndaj me publikun një kapitull të jashtëzakonshëm të jetës dhe artit të tij”.
Kate Moss dhe David Bowie ruajtën një miqësi të ngushtë për rreth një dekadë deri në ndarjen e tij nga jeta në vitin 2016.
Modelja ka treguar se shpesh është frymëzuar nga stili unik i ikonës britanike, madje në një rast ajo veshi një prej kostumeve të tij të famshme kur mori një çmim në emër të tij në BRIT Awards 2014.
