Ndonëse ka shumë dyshe të njohura nënë–bijë ose baba–bir, edhe vëllezërit dhe motrat kanë bashkuar forcat për të lënë gjurmë në histori. Lidhja mes vëllezërve e motrave është e veçantë, siç shkruan Jane Leder në librin The Sibling Connection: “Vëllezërit dhe motrat janë lidhja jonë me të kaluarën dhe ura drejt së ardhmes.”
Më poshtë janë pesë grupe vëllezërish dhe motrash që kanë bërë histori.
1. Motrat Schuyler
Angelica (lindur në vitin 1756), Elizabeth “Eliza” (1757) dhe Margaret “Peggy” (1758) Schuyler ishin tri vajzat më të mëdha të gjeneralit të Luftës Revolucionare Amerikane, Philip Schuyler. Ato u rritën në rezidencën Schuyler Mansion në Albany, Nju Jork. Për shumë vite, historia i la në hije, por fama e tyre u ringjall me muzikalin Hamilton të Lin-Manuel Mirandës në vitin 2015.
Angelica dhe Eliza ishin pjesë aktive e shoqërisë së lartë. Angelica u martua në moshën 21-vjeçare me biznesmenin John Barker Church dhe jetoi në Londër e Paris, ku organizonte takime me diplomatë, aristokratë dhe artistë. Eliza u martua me Alexander Hamilton-in në vitin 1780 dhe luajti një rol të rëndësishëm si mbështetje intelektuale dhe ndërmjetëse gjatë shkrimit të Federalist Papers. Peggy u martua me Stephen Van Rensselaer III dhe vdiq në moshë të re, 42 vjeçe, pas një sëmundjeje.
2. Motrat Brontë
Charlotte (1816), Emily (1818) dhe Anne (1820) Brontë u rritën në West Yorkshire të Anglisë dhe u bënë disa nga shkrimtaret më të njohura në historinë e letërsisë. Që në fëmijëri, ato shkruanin tregime dhe poezi për kënaqësinë e tyre.
Duke mos qenë nga një familje e pasur, motrat punuan si mësuese dhe guvernante, por nuk hoqën dorë nga pasioni për letërsinë. Ato botuan veprat e tyre me pseudonime mashkullore për të fshehur gjininë: Currer, Ellis dhe Acton Bell. Në vitin 1847 u botuan romanet Jane Eyre dhe Agnes Grey, ndërsa Wuthering Heights doli një vit më vonë. Të tria motrat vdiqën të reja nga tuberkulozi, por veprat e tyre mbeten klasike botërore.
3. Vëllezërit Wright
Wilbur (1867) dhe Orville (1871) Wright hynë në histori në vitin 1903 duke realizuar fluturimin e parë të kontrolluar me aeroplan. Megjithatë, motra e tyre më e vogël, Katharine (1874), luajti një rol kyç në suksesin e tyre, duke mbajtur dokumentacionin, duke i inkurajuar dhe duke menaxhuar marrëdhëniet shoqërore.
Të tre u rritën në Dayton, Ohio, ku fillimisht drejtuan një dyqan biçikletash dhe më pas kompaninë ajrore Wright. Ata ishin shumë të lidhur mes tyre, veçanërisht pas humbjes së hershme të nënës, gjë që i bashkoi edhe më shumë.
4. Motrat Mirabal
Patria (1924), Minerva (1926) dhe María Teresa (1935) Mirabal ishin aktiviste politike që kundërshtuan diktaturën e Rafael Trujillo-s në Republikën Domenikane. Ato panë nga afër shtypjen, dhunën dhe shkeljen e të drejtave civile që regjimi ushtronte ndaj popullit.
Në vitin 1959, ato themeluan Lëvizjen “14 Qershori”, e cila shpërndante materiale kundër regjimit dhe denonconte krimet e tij. Motrat dhe bashkëshortët e tyre u arrestuan, por gratë u liruan. Në nëntor 1960, ato u vranë brutalisht, megjithëse zyrtarisht u raportua si aksident automobilistik. Vrasja e tyre shkaktoi zemërim të madh dhe kontribuoi në rënien e regjimit.
5. Vëllezërit Kennedy
John (1917), Robert (1925) dhe Edward “Ted” (1932) Kennedy ishin bijtë e familjes së fuqishme Kennedy, një dinasti politike amerikane. John u bë presidenti i parë katolik i SHBA-së në vitin 1960, por u vra në vitin 1963. Robert shërbeu si prokuror i përgjithshëm dhe senator, dhe u vra gjatë fushatës presidenciale në vitin 1968. Ted Kennedy ishte senator për gati pesë dekada, deri në vdekjen e tij në vitin 2009.
