Kryeministri izraelit Benjamin Netanyahu është shpallur i shëruar nga kanceri pas një trajtimi të suksesshëm për një formë shumë të hershme të kancerit të prostatës, sipas një raporti zyrtar mjekësor të publikuar nga zyra e tij.
Raporti vjetor shëndetësor, i datës 20 prill 2026, zbulon për herë të parë se Netanyahu, 76 vjeç, iu nënshtrua një ndërhyrjeje kirurgjikale më 29 dhjetor 2024 në Qendrën Mjekësore Hadassah në Jerusalem për trajtimin e një zmadhimi benign të prostatës. Operacioni u konsiderua i suksesshëm dhe pa komplikime.
Gjatë një kontrolli rutinë pas operacionit, një rezonancë magnetike identifikoi një lezion shumë të vogël të dyshimtë në prostatë, me përmasa më pak se një milimetër. Analizat e mëtejshme konfirmuan praninë e një kanceri të prostatës në fazë shumë të hershme, pa shenja përhapjeje në organe të tjera.
Sipas raportit mjekësor, trajtimi me radioterapi u krye në Qendrën Mjekësore Hadassah dhe rezultoi plotësisht i suksesshëm. Ekzaminimet e mëvonshme laboratorike dhe imazherike konfirmuan zhdukjen e plotë të lezionit.
Vetë Netanyahu tha se publikimi i raportit u shty me qëllim për dy muaj për shkak të luftës me Iran.
“Zgjodha të vonoj publikimin e raportit në mënyrë që të mos dilte në kulmin e luftës dhe të mos përdorej nga Irani për propagandë”, tha ai në një deklaratë. “Sot mund të them se jam në gjendje të mirë shëndetësore dhe në formë të shkëlqyer fizike pasi trajtova një kancer të prostatës në fazë shumë të hershme që u hoq plotësisht.”
Mjekët që drejtuan trajtimin deklaruan se sëmundja u diagnostikua shumë herët dhe ndërhyrja ishte plotësisht efektive, duke e konsideruar kryeministrin izraelit tashmë pa shenja të kancerit.
