Kreu i SPAK iu drejtua sot Këshillit të Lartë të Prokurorisë duke bërë me dije se deri në këto momente nuk paraqitet një situatë problematike apo presione nga retorika politike që mund të cenojnë kompetencat e institucionit që ai drejton.
Sipas tij, deklaratat politike në vetvete nuk përbëjnë kërcënim për punën e Prokurorisë së Posaçme, ndërsa shqetësimi do të lindte vetëm nëse retorika do të shoqërohej me nisma konkrete ligjore që mund të prekin kompetencat e institucionit.
“Retorika në vetvete nuk përbën kërcënim. Për ta kuptuar se kur do të jetë shqetësuese, është kur do të shoqërohet me situatë ligjore që mund të prekë kompetencat e institucionit. Për momentin mendoj se nuk është problematike. Nëse do kemi ndonjë situatë të tillë, drafte apo projekte ligjore, ne do ngremë zërin dhe do ta bëjmë publik. Këtë mendim dhe shqetësim do ia përcjellim edhe KLP”, u shpreh kreu i SPAK.
Megjithatë, ndërkohë që nga SPAK thuhet se nuk ka ndërhyrje për momentin, në Kuvend kanë nisur iniciativa konkrete që lidhen me ndryshime në legjislacion.
Pas rastit “Balluku”, ku Gjykata Kushtetuese nuk arriti shumicën e nevojshme dhe gjyqtarët u ndanë në një votim 4 me 4 duke rrëzuar kërkesën e kryeministrit Edi Rama, deputetë socialistë kanë propozuar ndryshime në nenin 242 të Kodit të Procedurës Penale.
Sipas propozimit, gjykatësi nuk do të mund të vendosë masën e pezullimit nga detyra për disa nga funksionet më të larta shtetërore. Ndryshimi synon që të mos pezullohen nga detyra Presidenti i Republikës, Kryeministri, anëtarët e Këshillit të Ministrave, Avokati i Popullit, kreu i Kontrollit të Lartë të Shtetit dhe Guvernatori i Bankës së Shqipërisë.
Kjo nismë ka hapur debat mbi raportin mes reformës në drejtësi dhe kufizimeve të mundshme të kompetencave të organeve të drejtësisë për të ndërhyrë ndaj zyrtarëve të lartë të shtetit.
Ndërkohë, kreu i SPAK nuk komentoi faktin se një zëvendëskryeministre u mbrojt me votë nga Edi Rama. Belinda Balluku nuk u arrestua dhe politika i dha një goditje të fortë drejtësisë. Pas votës erdhi edhe projektligji për ndryshimet në ligj, por Braho zgjodhi të mos i prekë sot këto zhvillime./vna
