Ligjvënësit në Mbretërinë e Bashkuar kanë votuar kundër nisjes së një hetimi parlamentar që synonte të shqyrtonte nëse kryeministri Keir Starmer kishte mashtruar Dhomën e Komunave lidhur me emërimin e Peter Mandelson si ambasador në Shtetet e Bashkuara.
Me 335 vota kundër dhe 223 pro, parlamenti rrëzoi propozimin që çështja t’i kalonte Komitetit të Privilegjeve, i cili do të hetonte deklaratat e kryeministrit mbi procesin e verifikimit për emërimin e Mandelson.
Starmer e kishte emëruar Mandelson në dhjetor 2024, por e shkarkoi atë në shtator të vitit pasues, pasi u zbuluan lidhje më të gjera mes tij dhe financierit amerikan të dënuar për krime seksuale, Jeffrey Epstein.
Kryeministri britanik ka refuzuar thirrjet për dorëheqje, duke deklaruar se Mandelson kishte qenë i pasaktë në deklarimet e tij për marrëdhënien me Epstein dhe se disa informacione të rëndësishme i ishin fshehur gjatë procesit të verifikimit nga zyrtarët.
Opozita konservatore, e udhëhequr nga Kemi Badenoch, e ka akuzuar Starmer për mungesë transparence dhe e ka cilësuar vendimin për të urdhëruar deputetët laburistë të votojnë kundër hetimit si një veprim politik.
Nga ana tjetër, Starmer e ka quajtur kërkesën për hetim një manovër politike të opozitës në prag të zgjedhjeve lokale dhe rajonale.
