Dylan Sprouse dhe Barbara Palvin kanë konfirmuar se janë në pritje të fëmijës së tyre të parë.
Lajmi u bë publik gjatë paraqitjes së tyre në edicionin e 79-të të Cannes Film Festival në Francë, ku Barbara u shfaq me barkun e rrumbullakosur dhe shkëlqeu në tapetin e kuq.
Modelja 32-vjeçare kishte zgjedhur një fustan bojëqielli me detaje elegante dhe e pupla, ndërsa pozonte me dorën mbi bark, duke konfirmuar në mënyrë shumë të ëmbël shtatzëninë.
Historia e dashurisë së çiftit nisi në vitin 2017, kur u njohën në një festë. Vetëm një vit më vonë ata konfirmuan lidhjen dhe Barbara nuk e fshehu asokohe se ishte “shumë e dashuruar”.
Në një intervistë për Vogue Australia, ajo e përshkruante Dylan-in si “djalin perfekt”, duke thënë se ai ishte “shumë i sjellshëm dhe i ëmbël”.
Çifti u fejua në vitin 2023 dhe u martua vetëm pak muaj më vonë në Hungari, në një ceremoni romantike larg zhurmës së Hollywood-it.
Gjatë viteve, ata janë kthyer në një nga çiftet më të pëlqyera në rrjet, sidomos për mënyrën e natyrshme dhe mbështetëse që kanë treguar ndaj njëri-tjetrit. Barbara ka treguar më parë se një nga “rregullat” më të rëndësishme në martesën e tyre është të mos qëndrojnë larg njëri-tjetrit për shumë kohë.
Shtatzënia vjen edhe pas një periudhe sfiduese për Barbara-n, e cila vitin e kaluar zbuloi se kishte kryer një operacion për endometriozën, pas vitesh dhimbjesh dhe simptomash që mendonte se ishin “normale”.
Ajo tregoi se ndërhyrja e ndihmoi shumë dhe theksoi rëndësinë e diagnostikimit të hershëm, duke inkurajuar gratë të dëgjojnë më shumë trupin e tyre.
Tani duket se çifti po hyn në një kapitull krejtësisht të ri dhe shumë emocionues të jetës së tyre.
