Palma e Artë 2026 iu dha filmit “Fjord”. Filmi flet për një çift të devotshëm të krishterë që zhvendoset në një qytet të vogël në Norvegji dhe duhet të luftojë për të mbajtur kujdestarinë e fëmijëve të tyre pasi akuzohen për abuzim. Çmimi kryesor u shpall të shtunën në Festivalin e Filmit në Kanë nga regjisori koreano-jugor Park Chan-wook, president i jurisë. Renate Reinsve (“Sentimental Value”) dhe Sebastian Stan (“The Apprentice”) luajnë në filmin e parë në gjuhën angleze të regjisorit rumun Cristian Mungiu, i cili fiton Palmën e Artë për herë të dytë, pas suksesit të parë në vitin 2007 me dramën e fortë për abortin ilegal “4 Months, 3 Weeks and 2 Days”.
“Fjord” ishte një nga filmat më të komentuar të festivalit, por nuk ishte një fitues i pëlqyer nga të gjithë. Shumë kritikë e pritën ftohtë ose negativisht, duke e quajtur herë tepër manipulues dhe herë të paqartë në qëndrime. Megjithatë, disa vlerësuan kompleksitetin moral të filmit dhe shumica lavdëruan interpretimet e Reinsve dhe Stan. Në fjalimin e tij, Mungiu e quajti filmin “një zotim kundër çdo lloj fundamentalizmi”.
Më të favorizuar nga publiku dhe kritikët ishin filmat “Minotaur”, “Fatherland”, “All of a Sudden” dhe “A Man of His Time”. Të gjithë këta filma morën çmime, në përputhje me politikën e Kanës për të mos i dhënë më shumë se një çmim të njëjtit film. “Minotaur” i Andrey Zvyagintsev, një histori e ftohtë tradhtie dhe vrasjeje me sfond luftën e Rusisë në Ukrainë, fitoi çmimin e dytë më të rëndësishëm, Grand Prix.
Çmimi për Regjinë më të Mirë u nda mes polakut Paweł Pawlikowski për “Fatherland”, që tregon kthimin e shkrimtarëve Thomas dhe Erika Mann në Gjermaninë e pasluftës, dhe spanjollëve Javier Calvo dhe Javier Ambrossi për “The Black Ball”, një histori epike që shtrihet në disa dekada dhe lidhet me një roman të humbur të Federico García Lorca-s.
Skenari më i Mirë shkoi për regjisorin dhe shkrimtarin francez Emmanuel Marre për “A Man of His Time”, një film mbi ngritjen e një strategu politik në Francën e regjimit Vichy, i bazuar në përvojat e stërgjyshit të vetë Marre.
Në një edicion të Kanës ku shumë çmime u ndanë mes fituesve, çmimi për Aktoren më të Mirë u nda mes francezes Virginie Efira dhe japonezes Tao Okamoto për interpretimin e tyre prekës si dy gra që krijojnë lidhje përballë sëmundjes dhe vdekjes në dramën “All of a Sudden” të Ryusuke Hamaguchi-t.
Ndërsa çmimi për Aktorin më të Mirë shkoi për Emmanuel Macchia dhe Valentin Campagne, të cilët në filmin “Coward” të Lukas Dhont luajnë ushtarë belgë që bien në dashuri gjatë luftimeve në llogoret e Luftës së Parë Botërore dhe gjatë shfaqjeve artistike për shokët e tyre ushtarë. Çmimi i Jurisë iu dha gjermanes Valeska Grisebach për “A Dreamed Adventure”, që tregon historinë e një arkeologu që zbulon sekrete të errëta në një qytet pranë kufirit jugor të Bullgarisë.
Në një festival me pak yje të Hollivudit, dy filmat e vetëm amerikanë në konkurrim, “Paper Tiger” i James Gray dhe “The Man I Love” i Ira Sachs, mbetën pa çmime. Megjithatë, distributori amerikan Neon vazhdoi serinë e fitoreve me Palmën e Artë për të shtatin vit radhazi me “Fjord” dhe pritet të jetë sërish favorit në sezonin e ardhshëm të çmimeve, pas suksesit të “Anora” në çmimet Oskar të vitit 2025 dhe “Sentimental Value” këtë vit, pasi të dy filmat ishin prezantuar fillimisht në Kanë./syri
