Mjekët kanë përshëndetur si “të paprecedenta” rezultatet e një prove klinike ndërkombëtare që tregon se një injeksion me veprim të trefishtë kundër kancerit mund të zhdukë plotësisht tumoret te disa pacientë.
Në studimin e zhvilluar në 11 vende të botës, injeksioni iu dha pacientëve te të cilët kanceri ishte përhapur ose ishte rikthyer dhe nuk po reagonte më ndaj trajtimeve të tjera. Ilaçi, i quajtur amivantamab, arriti të zvogëlojë tumoret te më shumë se një e treta e pacientëve, ndërsa te 15 prej tyre tumoret u zhdukën plotësisht.
Profesor Kevin Harrington, specialist i terapive biologjike kundër kancerit në Institutin për Kërkimin e Kancerit në Londër, tha se bëhet fjalë për rezultate të jashtëzakonshme te pacientë që kishin zhvilluar rezistencë si ndaj kimioterapisë ashtu edhe ndaj imunoterapisë.
“Ky është një grup pacientësh për të cilët mundësitë e trajtimit janë jashtëzakonisht të kufizuara, ndaj ky nivel përfitimi është shumë mbresëlënës”, tha ai, duke shtuar se trajtimi ka potencialin të ndihmojë mijëra pacientë çdo vit.
Rezultatet do të prezantohen në Çikago në konferencën vjetore të Shoqatës Amerikane të Onkologjisë Klinike (ASCO), ngjarja më e madhe botërore në fushën e kancerit.
Në provën klinike morën pjesë 102 pacientë me kancer të kokës dhe qafës, një nga format më të zakonshme të kancerit në botë. Tumoret u zvogëluan ose u zhdukën te 43 pacientë. Nga këta, 28 patën tkurrje të konsiderueshme të tumorit, ndërsa 15 pacientë panë zhdukjen e plotë të tij.
Studiuesit raportuan se ilaçi ka dhënë rezultate të ngjashme edhe te pacientët me kancer të mushkërive. Amivantamab, i zhvilluar nga kompania Johnson & Johnson, po testohet aktualisht në rreth 60 studime klinike për kancerin e mushkërive, por edhe për forma të tjera si kanceri i zorrës së trashë, trurit dhe stomakut.
Ky injeksion vepron në tre drejtime njëkohësisht. Ai bllokon proteinën EGFR, e cila ndihmon rritjen e tumoreve, bllokon rrugën biologjike MET, që qelizat kancerogjene përdorin shpesh për t’i shpëtuar trajtimit, dhe njëkohësisht aktivizon sistemin imunitar që të sulmojë tumorin.
Një nga pacientët e parë që përfitoi nga trajtimi ishte Carl Walsh, 56 vjeç nga Birminghami, i diagnostikuar me kancer të gjuhës në vitin 2024. Pasi kimioterapia dhe imunoterapia nuk dhanë rezultat, ai u përfshi në studimin klinik OrigAMI-4.
“Pas fillimit të trajtimit, ënjtja u zvogëlua ndjeshëm dhe dhimbjet u pakësuan shumë. Sot ndihem në gjendje të bëj një jetë normale”, tha Walsh.
Ndryshe nga shumë trajtime të tjera kundër kancerit, amivantamab jepet me një injeksion të vogël nën lëkurë dhe jo përmes serumit intravenoz, duke e bërë trajtimin më të shpejtë dhe më të lehtë për pacientët dhe spitalet.
Shumica e efekteve anësore rezultuan të lehta ose mesatare dhe më pak se 10% e pacientëve u detyruan të ndërprisnin trajtimin për shkak të tyre.
Studiuesit theksuan se prova klinike u përqendrua te pacientët me kancer të kokës dhe qafës që nuk lidhej me virusin HPV, një grup pacientësh që zakonisht kanë prognozë më të vështirë dhe më pak mundësi trajtimi.
Pacientët që morën amivantamab jetuan mesatarisht 12.5 muaj pas nisjes së trajtimit, pavarësisht se kishin forma të kancerit me prognozë shumë të rëndë pasi trajtimet standarde kishin dështuar.
Profesor Kristian Helin, drejtor ekzekutiv i Institutit për Kërkimin e Kancerit në Londër, tha se studimi tregon se zhvillimi i terapive të reja mund të sjellë përparime domethënëse edhe për pacientët që kanë shumë pak alternativa trajtimi.
“Arritja e këtij niveli reagimi të tumoreve dhe rezultatet inkurajuese për mbijetesën përfaqësojnë një hap të rëndësishëm përpara”, u shpreh ai.
