Rafael Leao rrezikon të humbasë ndeshje në Botëror, pas kartonit të kuq që mori në miqësoren e FIFA-s mes Portugalisë dhe Kilit. Portugezët fituan 2 me 1, por rezultati kaloi në plan të dytë.
Rezultati ishte 0 me 0 në fundin e pjesës së parë, kur Leao goditi me grusht Ivan Roman.
Lojola nga Kili dhe Kanselo nisën gjithçka në miqësore.
Ishte një incident mjaft i vogël që solli më pas përplasjen fizike mes lojtarëve.
Lojtari i Milanit ndërkohë u justifikua, duke thënë se po mbronte shokun e skuadrës. Zakonisht një karton i kuq në miqësore vlen vetëm për miqësoren e ardhshme, por në këtë rast Leao u largua nga fusha për sjellje të dhunshme.
Komiteti i Disiplinës në FIFA gëzon të drejtën që ta shtrijë dënimin dhe të prekë ndeshjet zyrtare.
Nëse ndodh, atëherë Leao mund të humbasë sfidën e parë ndaj Republikës Demokratike të Kongos më 17 qershor.
Përndryshe, nëse kartoni i kuq do vlejë vetëm për miqësore, portugezi nuk do luajë në miqësoren me Nigerinë më 10 qershor.
