Një oficer policie u qëllua për vdekje të enjten në mëngjes gjatë një operacioni policor në Toronto, në kuadër të një hetimi për të shtënat ndaj Konsullatës Amerikane të ndodhura në muajin mars.
Lajmi u konfirmua nga shefi i Policisë së Torontos, Myron Demkiw, i cili tha se oficeri 43-vjeçar humbi jetën gjatë ekzekutimit të një urdhër-kontrolli në orët e para të mëngjesit.
“Me trishtim të thellë konfirmoj vdekjen e oficerit”, deklaroi Demkiw.
Sipas policisë, operacioni u zhvillua në një lagje në veriperëndim të qytetit. Rreth orës 05:45, forca të shumta policore të armatosura hynë në një ndërtesë banimi, ndërsa pak minuta më vonë mjekët e ambulancës u panë duke kryer manovra reanimimi mbi oficerin e plagosur rëndë.
Oficeri u transportua me urgjencë në spital, por nuk mundi t’u mbijetonte plagëve të marra. Mediat kanadeze raportojnë se edhe një person tjetër u dërgua në spital me ambulancë.
Autoritetet bënë të ditur se operacioni lidhej me një hetim të sigurisë kombëtare për sulmin me armë ndaj Konsullatës Amerikane në Toronto, ku më 10 mars dy persona hapën zjarr jashtë godinës diplomatike përpara se të largoheshin nga vendi i ngjarjes.
Një i dyshuar 19-vjeçar është identifikuar nga autoritetet, por vijon të jetë në arrati.
Pas sulmit të marsit, masat e sigurisë u shtuan në përfaqësitë diplomatike amerikane dhe izraelite në Toronto, në një periudhë tensionesh të larta të lidhura me konfliktin në Lindjen e Mesme.
