Të paktën 17 fermerë u vranë dhe pesë të tjerë u plagosën gjatë një sulmi të armatosur në Zamfara, në veriperëndim të Nigerisë, njoftuan autoritetet lokale dhe banorët për AFP.
Sipas burimeve lokale, agresorët të cilët lëviznin me motoçikleta, hapën zjarr ndaj fermerëve që po punonin në arat e tyre në komunitetin e largët Goran Namaye. Si pasojë e sulmit, 17 persona humbën jetën, ndërsa pesë të tjerë mbetën të plagosur.
“Këtë mëngjes mora një raport se 17 persona u vranë në komunitetin Goran Namaye”, deklaroi Sanusi Dosara, një zyrtar i distriktit Maradun.
Ndërkohë, udhëheqësi i komunitetit, Abubakar Jarra, konfirmoi bilancin e viktimave, duke bërë të ditur se tre nga të plagosurit ndodhen në gjendje të rëndë.
Rajonet veriore dhe qendrore të Nigerisë vazhdojnë të përballen me sulme të shpeshta nga grupe të armatosura dhe organizata xhihadiste, të cilat kryejnë rrëmbime për shpërblim, sulme vdekjeprurëse dhe zhvatje ndaj komuniteteve lokale. Shpesh, fermerët detyrohen të paguajnë grupeve kriminale për t’u lejuar të punojnë tokat e tyre.
Vetëm javën e kaluar, 39 të moshuar nga një fshat në të njëjtën zonë u rrëmbyen teksa po shkonin drejt një kampi të bandave të armatosura për të negociuar një marrëveshje paqeje që do t’u mundësonte banorëve të vazhdonin aktivitetet bujqësore.
