Groenlanda është përballur së fundmi me shpërthime zjarresh, një fenomen i rrallë për këtë periudhë të vitit, që sipas ekspertëve mund të lidhet me ndikimet e ndryshimeve klimatike dhe ngrohjes globale.
Karl Brix Zinglersen, kreu i Departamentit të Mjedisit dhe Burimeve Minerale në Institutin e Natyrës së Groenlandës, deklaroi se është e pazakontë që zjarre të tilla të ndodhin që në muajin qershor.
“Është e rrallë që zjarre të tilla të shpërthejnë kaq herët gjatë verës dhe është e arsyeshme të mendohet se ndryshimet klimatike, veçanërisht ngrohja e Arktikut, si dhe fenomeni aktual El Niño, kanë ndikuar në krijimin e këtyre kushteve”, tha ai për AFP.
Sipas ekspertit, në Groenlandë, ishullin arktik ku pjesa më e madhe e territorit mbulohet nga akulli dhe zonat pa akull dominohen nga tundra, zjarret kanë qenë historikisht shumë të rralla.
Shkencëtarët kanë paralajmëruar prej vitesh se rajoni i Arktikut po ngrohet më shpejt se pjesa tjetër e planetit, duke rritur rrezikun e fenomeneve ekstreme, përfshirë zjarret në zona ku më parë konsideroheshin pothuajse të pamundura.
