Shqetësimi i mazhorancës socialiste për impaktin e mundshëm ekonomik që sjellin sekuestrimet e aseteve kriminale, veçanërisht ndaj palëve të treta në biznes, është përplasur me qëndrimin e prerë të SPAK për zero tolerancë. Teksa deputeti i PS-së, Damian Gjiknuri, ka ngritur alarmin për pasojat zinxhire në ekonomi duke marrë si shembull një rast të vetëm me vlerë 160 milionë euro, prokurori i Posaçëm, Klodian Braho, u është përgjigjur prerë shqetësimeve të politikës. Duke i cilësuar pasuritë e rrjedhura nga krimi si një “tumor në ekonomi”, Braho konfirmoi se vala e sekuestrimeve nuk do të ndalet dhe se e vetmja zgjidhje mbetet konfiskimi, ndonëse garantoi se interesat e ligjshme të bizneseve që kanë vepruar në mirëbesim do të mbrohen.
Damian Gjiknuri: Çfarë pasojash kanë personat që kanë porositur apo furnizuar në asete që rezultojnë pasuri e krimit? Ky është një fenomen që duhet konsideruar nga ana e politikës penale. Po hyni me vlera të mëdha, 160 milionë vetëm një rast. Ta kalojmë lumin me këmbët tek gurët. A dimë ku po shkojmë? Tek palët e treta. Impakti në ekonomi mund të jetë i jashtëzakonshëm.
Klodian Braho: Pasuritë e krimit janë tumor në ekonomi, dhe nuk ka zgjidhje tjetër veç sekuestrimit dhe konfismimit. SPAK është i vendosur të mos të mos tolerojë. Sa u takon personave të tjerë të përfshirë në biznese me këto shoqëri tregëtare të sekuestruara në mirëbesim, janë interesa të ligjshme që SPAK do i mbrojë dhe nuk do ti cënojë.
Është sfidë për drejtorinë e administrimit. Agjencia përkatëse duhet parë sa kapacitet ka për të përballuar këto nivele sekuestrimesh. Do të ketë të tjera. Produktet e krimit do të sekuestrohen, interesat e ligjshme nuk do të preken.
