Një ngjarje e rëndë e ndodhur rreth një muaj më parë në Fier është rikthyer në vëmendjen e opinionit publik, pasi pamjet e dhunës u publikuan në rrjetet sociale.
Sipas informacioneve, një 17-vjeçare është dhunuar fizikisht nga tre bashkëmoshatare brenda një banese. E mitura ishte ftuar nga vajzat me pretendimin se do të sqaronin një mosmarrëveshje, por takimi përfundoi në një akt të rëndë dhune. Gjatë incidentit, njëra prej të pranishmeve ka filmuar ngjarjen, ndërsa dyshohet se ka nxitur edhe agresionin.
Rasti është denoncuar në Policinë e Fierit nga prindërit e 17-vjeçares një ditë pas ngjarjes. Sipas familjarëve dhe banorëve të zonës, nuk pati një reagim të menjëhershëm nga institucionet, ndërsa çështja mori vëmendje të gjerë vetëm pas publikimit të videos në rrjetet sociale.
Të afërmit bëjnë me dije se e mitura, me inicialet P.D., kishte lënë shkollën për të ndjekur një kurs parukerie, me synimin për të krijuar një profesion.
Nëna e 17-vjeçares, në një prononcim për mediat, shprehet se vajza e saj po përjeton një gjendje të rënduar psikologjike pas ngjarjes. Ajo kërkon ndërhyrjen e institucioneve përgjegjëse dhe thotë se familja jeton me frikë edhe për sigurinë e fëmijëve të tjerë të mitur.
Ndërkohë, çështja po hetohet nga Prokuroria pranë Gjykatës së Shkallës së Parë të Juridiksionit të Përgjithshëm në Fier, e cila vijon veprimet për zbardhjen e plotë të rrethanave të ngjarjes.
