Një protestues ka tërhequr vëmendjen në ditën e 44-t të protestës kundër qeverisë, duke mbajtur në duar një pankartë me foton e kryeministrit Edi Rama dhe artistit amerikan Kanye West, të shoqëruar me mesazhin: “Ku i fute 4 milionë euro?”
Sipas tij, pankarta ishte një formë proteste ndaj financimit të koncertit të Kanye West me fonde publike. Ai u shpreh se këto para duhej të ishin investuar për përmirësimin e kushteve në spitalet e vendit dhe jo për organizimin e një eventi muzikor.
Protestuesi tha se mesazhi i tij ka më shumë ndikim sesa koncerti i financuar nga qeveria, duke theksuar se me një shpenzim simbolik për pankartën ka arritur të ngrejë një debat publik më të madh se ai që, sipas tij, synohej me investimin prej 4 milionë eurosh.
“Kam zgjedhur këtë pankartë sepse për dy orë na morën 4 milionë euro nga xhepat tanë. Ato para mund të ishin përdorur për të përmirësuar spitalet, për krevate më të mirë, kondicionerë dhe kushte dinjitoze për pacientët. Unë kam shpenzuar vetëm 200 lekë për këtë pankartë dhe besoj se ky është imazhi më i mirë që i bëhet Shqipërisë. Vetë kam vuajtur në spitale, madje për një vizitë në zemër më futën në sallën e operacionit pa kryer më parë vizitat e nevojshme”, u shpreh ai.
