Një protestë masive në Val di Susa, në veri të Italisë, është kthyer në përplasje të dhunshme mes protestuesve dhe forcave të rendit. Rreth 20 mijë persona morën pjesë në marshimin kundër ndërtimit të linjës hekurudhore me shpejtësi të lartë Torino-Lion, ndërsa një grup prej qindra personash të maskuar sulmoi kantierin e punimeve në Chiomonte.
Protesta ishte pjesë e festivalit tradicional “Alta Felicità”, i organizuar nga lëvizja “No Tav”, e cila prej vitesh kundërshton projektin hekurudhor që lidh Italinë me Francën.
Fillimisht, marshimi u zhvillua pa incidente, por situata ndryshoi kur një grup prej rreth 700 personash u shkëput nga turma dhe u drejtua drejt kantierit. Përmes shtigjeve pyjore, ata arritën pranë zonës së punimeve dhe rreth orës 16:30 hapën një pjesë të rrethimit duke hyrë brenda kantierit.
Gjatë përplasjeve me policinë, karabinierët dhe Guardia di Finanza u përdorën gurë, bomba artizanale, fishekzjarre dhe kokteje molotov. Disa automjete të forcave të rendit u përfshinë nga flakët gjatë incidenteve.
Bilanci i përditësuar flet për rreth 150 efektivë të plagosur. Mes tyre janë 68 karabinierë, 18 pjesëtarë të Guardia di Finanza dhe rreth 50 punonjës të policisë. Disa prej tyre kanë marrë trajtim mjekësor për shkak të dëmtimeve të shkaktuara gjatë përleshjeve.
Ngjarjet kanë sjellë reagime nga autoritetet më të larta italiane. Presidenti Sergio Mattarella kontaktoi ministrin e Brendshëm Matteo Piantedosi për të shprehur mbështetjen ndaj forcave të rendit të prekura nga incidentet.
Edhe kryeministrja Giorgia Meloni dënoi dhunën, duke e cilësuar sulmin ndaj forcave të rendit dhe dëmtimin e mjeteve shtetërore si akte që tejkalojnë një protestë normale.
Ndërkohë, autoritetet italiane po vijojnë hetimet për identifikimin e personave përgjegjës për dhunën dhe dëmet e shkaktuara gjatë përleshjeve në Val di Susa.
