Partia Demokratike ka ngritur një tjetër akuzë ndaj Bashkisë së Tiranës, duke denoncuar një rast të pretenduar të trajtimit të padrejtë të një qytetari gjatë procedurave për mbledhjen e detyrimeve tatimore. Zëdhënësja e Antikorrupsionit në PD, Genta Vangjeli, deklaroi se denoncimi është bërë nga qytetari Lush Vukaj, i cili sipas saj ka paraqitur edhe dokumentacion për rastin.
Sipas PD-së, gjatë këtij viti Bashkia e Tiranës ka lëshuar një urdhër ekzekutimi për llogarinë bankare të qytetarit Gentian Lush Vukaj, duke kërkuar shlyerjen e detyrimeve tatimore, përfshirë edhe kamatëvonesat. Partia Demokratike pretendon se qytetari e ka shlyer të plotë shumën e kërkuar nga Bashkia e Tiranës, por pavarësisht kësaj, e njëjta shumë është ekzekutuar edhe nga llogaria e tij bankare, duke e detyruar të paguajë dy herë të njëjtin detyrim.
PD kërkoi nga Bashkia e Tiranës që të kryejë menjëherë verifikimet për rastin, të përcaktojë përgjegjësitë administrative dhe, nëse pretendimet rezultojnë të sakta, të bëjë rimbursimin e shumës së mbajtur padrejtësisht. “Bashkia e Tiranës duhet të jetë në shërbim të qytetarëve dhe të garantojë respektimin e të drejtave të tyre”, u shpreh zëdhënësja e Antikorrupsionit në PD. Deri në publikimin e kësaj deklarate, nuk ka pasur një reagim zyrtar nga Bashkia e Tiranës lidhur me pretendimet e ngritura nga Partia Demokratike.
Deklarata e zëdhënëses së Antikorrupsionit në PD, Genta Vangjeli:
Partia Demokratike sjell sot në vëmendje një tjetër rast shqetësues të trajtimit të qytetarëve nga Bashkia e Tiranës, bazuar në një denoncim të mbërritur pranë nesh nga z. Lush Vukaj.
Sipas denoncimit dhe dokumentacionit të paraqitur, gjatë këtij viti Bashkia e Tiranës ka lëshuar një urdhër ekzekutimi për llogarinë bankare të qytetarit Gentian Lush Vukaj, duke kërkuar shlyerjen e detyrimeve tatimore, përfshirë detyrimet e prapambetura dhe kamatëvonesat.
Qytetari deklaron se ka kryer pagesën e plotë të detyrimit sipas shumës së kërkuar nga Bashkia e Tiranës.
Megjithatë, pavarësisht këtij likuidimi, e njëjta shumë është mbajtur edhe nëpërmjet bllokimit dhe ekzekutimit të fondeve në llogarinë e tij bankare, duke e detyruar praktikisht të paguajë dy herë për të njëjtin detyrim.
Pasi konstatoi këtë situatë, qytetari iu drejtua bankës së nivelit të dytë, e cila e orientoi të ndiqte procedurat pranë Bashkisë së Tiranës. Por, edhe pas disa paraqitjeve në këtë institucion, ai theksoi se jo vetëm që problemi nuk është zgjidhur, por ai është përballur edhe me mungesë korrektësie dhe arrogancë nga administrata.
Denoncimi i PD per bashkine e TiranesDownload
Ky është një rast që ngre pikëpyetje serioze mbi mënyrën se si administrohen procedurat e mbledhjes së detyrimeve dhe mbi respektimin e të drejtave të qytetarëve.
Partia Demokratike i kërkon Bashkisë së Tiranës të verifikojë menjëherë këtë rast, të sqarojë përgjegjësitë administrative që kanë çuar në këtë situatë dhe, nëse pretendimet e qytetarit rezultojnë të vërteta, të kryejë pa asnjë vonesë rimbursimin e shumës së mbajtur padrejtësisht, në bashkëpunim me institucionin bankar përkatës.
Njëkohësisht, u bëjmë thirrje institucioneve përgjegjëse të marrin masa që raste të tilla të mos përsëriten më.
Bashkia e Tiranës duhet të jetë në shërbim të qytetarëve dhe bankat duhet të garantojnë siguri juridike për çdo veprim që prek pasurinë e klientëve. Shteti i së drejtës fillon me respektimin e të drejtave më elementare të qytetarëve.
